Tesla 2024-cü ildə Hindistana elektrik avtomobilləri ixrac etməyə başlaya və iki ildən sonra ölkədə onların istehsalı üçün zavod tikə bilər.

Valyuta.az Bloomberg-ə istinadla xəbər verir ki, Tesla Hindistan hökuməti ilə elektromobillərin tədarükü və avtomobillərinin ölkədə istehsalının yerləşdirilməsi ilə bağlı razılaşmaya xeyli yaxındır. Tərəflər bu yaydan bəri bu barədə danışıqlar aparırlar. Razılaşmanın 2024-cü ilin yanvarında elan ediləcəyi gözlənilir.

Tesla-nın Hindistanda elektrik avtomobil zavodu tikmək üçün ilkin olaraq minimum 2 milyard dollar sərmayə qoyacağı və Cənubi Asiya respublikasında avtomobil hissələrinin alışını 15 milyard dollara çatdırmağa çalışacağı gözlənilir. Elektrik avtomobillərinin istehsalı üçün zavodun tikintisinə sahə elektrik avtomobillərinin istehsalı və üçüncü ölkələrə ixracı üçün artıq yaxşı inkişaf etmiş ekosistemlərin mövcud olduğu Qucarat və ya Tamil Nadu ştatlarında verilə bilər.

Tesla ildə 500 min avtomobil istehsal gücünə malik zavod tikməyi təklif edir. İstehsal olunan modellərin minimum dəyəri təxminən 25 min dollar olacaq.

Əvvəllər Tesla Hindistana elektrik avtomobillərinin idxalına görə rüsumların azaldılmasına nail olmağa çalışsa da, Nyu-Dehli bununla razılaşmayıb və şirkət öz məhsullarını ölkəyə ixrac etmək planlarından müvəqqəti olaraq imtina edib. Tesla-nın CEO-su İlon Maskın may ayında The Wall Street Journal-a verdiyi müsahibədə “Hindistan xaricdə yeni bir şirkət zavodu qurmaq üçün maraqlı yer ola bilər” deyib və bununla bağlı qərarın 2023-cü ilin sonuna qədər veriləcəyini qeyd edib. İyun ayında Mask Vaşinqtonda Hindistanın baş naziri Narendra Modi ilə görüşüb və görüşün sonunda “Teslanın Hindistana gələcəyinə və bunun mümkün qədər tez baş verəcəyinə” əmin olduğunu bildirib. 

Nicat