Son zamanlar paytaxt Bakının müxtəlif məkanlarında küçə ticarətinin geniş vüsət almağa başlayıb. Hansı ki, belə yerlərdə adətən antisanitariya hökm sürür. Maraqlısı odur ki, müvafiq qurumların küçə ticarətinə qarşı mübarizəsi də nədənsə müvvəqqəti xarakter daşıyır. Hansısa bir məkanda bu gün yığışdırılan küçə ticarəti, üstündən bir neçə gün keçməmiş yenidən həmin məkanda bərpa olunur. Bu da onu göstərir ki, küçə ticarətinə qarşı aparılan mübarizə ciddi effekt vermir.

Mövzu ilə bağlı Valyuta.az-a açıqlamasında iqtisadçı ekspert Pərviz Heydərov bildirir ki, yaranmış vəziyyət küçə ticarətinə qarşı mübarizənin rayon icra hakimiyyətləri səviyyəsində aparılmasından qaynaqlanır: 

“Ona görə də küçə ticarətinə qarşı mübarizə geniş xarakter daşımır. Həmin qanunsuz ticarət yığışdırılsa da, üstündən bir həftə keçməmiş yenidən peyda olur. Küçə ticarətinə qarşı mübarizə bir qədər ehtiyatlı olmağı tələb edir. Söhbət burada küçə ticarətilə məşğul əhalinin əlindəki malları realizə etməsi imkanının təşklindən gedir.Bunu təşkil etmədən, onlarla inzibati metodlarla mübarizə aparmaq, kortəbii şəkildə ləğv etmək heç bir halda uzunmüddətli effekt verməyəcək”. 

Həmsöhbətimiz deyir ki, problemin həlli üçün kompleks tədbirlərə ehtiyac var:

“Onlar müvafiq ticarət şəbəkələrində yerləşdirilməlidirlər. Digər tərəfdən, bu insanların müvafiq pərakəndə satış ticarət mərkəzlərindən kənarda fəaliyyət göstərmələrinə zəmin yaradan amillər araşdırılmalı və mübarizə də ona qarşı aparılmalıdır. Belə vəziyyətin qiymət, məsafə, keyfiyyət və ya başqa fərqlərdən qaynaqlandığı araşdırılmalıdır. Bu araşdırmadan sonra məsələ ilə bağlı kompleks tədbirlər görülməlidir. Daha rayon icra hakimiyyətləri səviyyəsində yox”.

Ramiz