Azərbaycanda artıq iki ildən çoxdur ki, icbari tibbi sığorta tətbiq edilir. Proses bir sıra müsbət nəticələr versə də, bir sıra hallarda insanları tam olaraq qane də etmir. Hələ də özəl tibb müəssisələrinin əksəriyyətində icbari tibbi sığorta tətbiq edilmir. Bir sıra ekspertlər iddia edir ki, həmin sistemə keçid özəl klinikaların gəlirlərinin azalması ilə nəticələnə bilər. 

Valyuta.az-a açıqlamasında tibb elmləri doktoru Adil Qeybulla bildirir ki, əslində özəl xəstəxanalar icbari tibbi sığortadan yayınmır: 

“Əksinə, onlar icbari tibbi sığortada maraqlıdırlar. Sadəcə olaraq, fakt odur ki, özəl xəstəxanaları bu işə cəlb etmirlər. Məsələn, tibb Universitetinin iki korpusu, cərrahiyə və terapiya korpusları var. Birinci növbədə fikirləşməliyik ki, rezidentləri necə hazırlamalıyıq. Bura xəstə daxil olmasa rezidentlər hazırlana bilməz. Onu da nəzərə alaq ki, özəl klinikaların maddi-texniki təchizatı dövlət xəstəxanalarından yüksəkdir. Ona görə də onların imkanlarından istifadə etmək lazımdır”. 

İqtisadçı ekspert Natiq Cəfərli isə qeyd edir ki, özəl klinikaları məcburən bu işə cəlb etmək mümkün deyil: 

“Bunun üçün qarşılıqlı güzəştlər və stimullaşdırıcı addımlar olmalıdır ki, özəl tibb müəssisələri də icbari tibbi sığortaya qoşulsun. Sığorta ilə ödənilən xərclər özəl klinikaları qane etmədiyindən, onlar çox zaman bu proqramdan kənarda qalır. İcbari tibbi sığortanın qarşıladığı məsələlər, işin keyfiyyəti, növləri, xidmətlər isə vətəndaşları qane etmir. Ona görə də sanki icbari tibbi sığorta üçün boş yerə pul veririk”. 

Bu fonda həmsöhbətimiz təklif edir ki, icbari tibbi sığortanın iş prinsipləri dəyişdirilsin:

“Özəl klinikakarın prosesə qoşulması üçün stimullaşdırıcı addımlar olmalıdır. Vergi güzəştləri olmalı, yaxud da prosesin bir hissəsini dövlət qarşılamalıdır”. 

Ekspert bəzi məmur və deputatların icbari tibbi sığortaya ödənişlərin artırılması təklifini də doğru yanaşma hesab etmir:

“Bu doğru yanaşma deyil və gəlirləri az olan insanların narazılığına səbəb olar”. 

Ramiz