Azərbaycanda işçilərin maaşları sovet dövründə olduğu kimi aylıq əmək haqqı sistemi çərçivəsində ödənilir. Bu fonda bəzi ekspertlər düşünür ki, artıq ölkəmizdə də bir sıra inkişaf etmiş ölkələrdə olduğu kimi, saat hesabı əmək haqqı sisteminə keçilməlidir. 

Qeyd edək ki, hazırda Azərbaycanda orta nominal (vergi, sosial ödənişlər, üzvlük haqları tutulmazdan öncə) əmək haqqı 923 manatdır. 

Valyuta.az-a açıqlamasında İqtisadi və Sosial İnkişaf Mərkəzinin rəhbəri Rəşad Həsənov bildirib ki, ölkənin özəl və dövlət sektorunda məhsuldar əsaslı əmək haqqı modelinin tətbiqinə üstünlük verilməsi daha yaxşı olar: 

"Ölkəmizdə də artıq saat hesabı əmək haqqı sisteminə keçilməsi mümkündür. Bunun üçün də qanunvericiliyə müvafiq dəyişikliklər edilməlidir. Eyni zamanda, əmək bazarında, xüsusən də özəl sektorda prosesə nəzarət gücləndirilməlidir. İnkişaf etmiş ölkələrin mütləq əksəriyyətində saatlıq əmək haqqı tətbiq edilir".

Amma ekspert düşünür ki, belə bir yanaşmanın tətbiqi müəyyən mənada gələcəkdə genişlənməkdə olan məsafədən işləmə ilə əlaqədar qiymətləndirmədə çətinliklər yarada bilər:

“Bu zaman müəssisələr tərəfindən sui-istifadə hallarının genişlənməsi də mümkündür. Lakin bu istiqamətdə də müxtəlif çərçivə alətləri var. Onu tətbiq etməklə Azərbaycanda həmin modelin tətbiqi mümkündür. Hökumət saat hesabı əmək haqqı sisteminə keçəcəksə, bu zaman özünün maliyyə imkanları və ölkənin sosial-iqtisadi imkanlarını nəzərə almaqla tarifləri müəyyənləşdirəcək. Nəticədə aylıq tariflərlə saatlıq tariflər arasında ciddi fərqlər ortaya çıxmayacaq”. 

Həmsöhbətimiz qeyd edir ki, Azərbaycanda narahatedici başqa məqam qeyri-iş günlərinin sayının çox olmasıdır:

“Azərbaycan bu yöndə dünyada öndə gedir. İş günləri sayının az olması yekunda iş saatları sayının az olmasına gətirib çıxara bilər. Dolayısı ilə də vətəndaşın illik qazancı əvvəlki dövrlə müqayisədə aşağı düşə bilər. Saat hesabı əmək haqqı sisteminin tətbiqi fonunda bu hallar da nəzərə alınmalıdır”. 

Ramiz