"Düşünmürəm ki, bütün texnologiyalar rüsumdan azad olunmalıdır və bu, çıxış yoludur. Amma hansısa sahə ilə bağlı selektiv və müəyyən zaman müddətində addımlar atıla bilər”.

Bu sözləri Valyuta.az-a iqtisadçı Xalid Kərimli “Azərbaycanda informasiya texnologiyaları gömrük rüsumundan azad oluna bilərmi” sualına cavab verərkən deyib.

Xalid Kərimli bildirib ki, gömrük rüsumlarının üç əsas funksiyası olur: 

"Birincisi, büdcəni doldurmaqdır. İkincisi, daxili bazarın proteksiyası, qorunmasıdır. Azərbaycanda da daxili bazar olmadığına görə informasiya texnologiyaları istehsal edilmir. Ona görə də bu funksiya texnologiyalara nisbətdə doğru deyil. Üçüncüsü isə, istehlakçı və sosial istehlak funksiyasıdır. Bu funksiya ilə istehlakı tənzimləmək də gömrük rüsumları ilə həll olunur”.

Ekspert Azərbaycanda rüsumların yüksək olmadığını düşünür:

"Türkiyə, İranla müqayisədə gömrük rüsumları çox deyil. Bunun da ciddi problem yaratdığını düşünmürəm. Amma məsələyə selektiv yanaşmaq olar. Hamı deyir ki, rüsumlar ləğv olunmalıdır, bəs bu zaman büdcənin gəlir hissəsi necə mədaxil olunsun, dövlət orduya, təhsilə, səhiyyəyə necə pul xərcləsin? Belə baxanda vergiləri ləğv etmək ən yaxşısıdır. Liberal iqtisadiyyat bu cür prosesləri sevmir. Amma dövlət varsa, vergi olmalıdır, dövlət qüdrətlidirsə, vergilər də olmalıdır, çünki hər şey pulun üzərində qurulub".

Xalid Kərimli qeyd edib ki, hökumət bu sahəyə bir az spesifik yanaşmalıdır:

“Dövlət isə düşünür ki, sən ən yüksək funksiyalara malik informasiya texnologiyaları alırsansa, demək pulun var və bu puldan büdcəyə verməlisən. Büdcənin isə yenidən bölüşdürmə, sosial və s. funksiyaları var. Mən bütün texnologiyalara gömrük rüsumu yox, ancaq spesifik yanaşmanın tərəfdarıyam. Texnologiya vacibdir, ərzaq da vacibdir, maşın da vacibdir, bu zaman gömrük rüsumunun tətbiq edilməli sahə də qalmır. Başqa nə qalır? Ona görə bu rüsumlar olmalıdır”.

Davud