Biznesə başlamaq istəyənlərin ilk ağlına gələn nə qədər vəsaitin lazım olduğudur. Əksər insanlar bunun üçün çox pulun lazım olacağını düşünsələr də, 1000 manatla, hətta pulsuz biznes qurula biləcəyini ağıllarına gətirmirlər. 

Biznes konsultant Taryel Faziloğlu Valyuta.az-a 1000 manatla qurula biləcək bizneslərdən danışdı: “Əlbəttə, 1000 manat vəsaitlə də biznes qurmaq mümkündür. İnsanlar çox vaxt bunun mümkünsüzlüyünü düşünsə də, əslində hər şeyin onlardan asılı olduğunu bilmirlər. Özlərini qorxudurlar, biznes qurmaq üçün fantastik məbləğlər düşünürlər. Təbii ki, bu sizin qurmaq istədiyiniz biznesdən də asılıdır. Az məbləğ tələb edən bizneslər var. Məsələn, siz 1000 manatla onlayn şəbəkələr vasitəsilə xırdavat əşyalar, bəzək əşyaları və bu qəbildən mallar sata bilərsiniz. Pul qazandıqca yavaş-yavaş bu işi böyüdə bilərsiniz. Amma bu zaman, səbir və yaradıcı fikirlər tələb edir. Sizin yaradıcı ideyalarınız olarsa, bu bizneslə irəliləyə bilərsiniz”.

Mütəxəssis 1000 manatla biznes qurmaqdansa, şəxsi bacarıqları möhkəmləndirməyin tərəfdarıdır: “Mən məsləhət görərdim ki, 1000 manatla şəxsi biznes qurmaq istəyən şəxs bu pulu xüsusi ixtisas, bacarıq, peşə öyrənmək üçün xərcləsin. Məsələn, o vəsaiti hansısa proqramlaşdırma, qrafik dizayner, bunun kimi bir çox internet üzərindən olan və tələbatın çox olduğu sahəni öyrənmək üçün xərcləyə bilər. Həmin bacarıqlarını möhkəmləndirdikdən sonra daha gəlirli işə başlaya bilər”. 

Taryel Faziloğlu nəinki 1000 manatla, hətta pulsuz da biznes qurmağın mümkün olmasından söz açdı: “0 manatla da biznes qurmaq olar, amma bunun üçün insan hansı bacarıqlarının olduğunu bilməlidir. O bacarıqların cəmiyyətdəki hansı ehtiyaclarla üst-üstə düşdüyünü araşdırmalıdır. Bacarıqlarına cəmiyyətdə nə qədər tələbat olduğunu öyrənməlidir. Həmin bacarıqlarını inkişaf etdirərək sıfırdan özü üçün yeni bir iş fürsəti yarada bilər”.

Nuray