NASA qiymətli metallarla dolu "16 Psyche" asteroidinə missiyanın növbəti dəfə təxirə salındığını açıqlayıb.

Valyuta.az xəbər verir ki, avqustun birindən oktyabrın 11-dək planlaşdırılan reysin sözügedən tarixlərdə həyata keçirilməyəcəyi bildirilib. Mütəxəssislər bildirirlər ki, eni təxminən 200 kilometr olan, Mars və Yupiter arasındakı asteroid qurşağında yerləşən meteorit "M" tipli kosmik obyektlərin ən böyüyüdür. Silikatdan əmələ gələn digər asteroidlərdən fərqli, "16 Psyche" dəmir və nikel kimi qiymətli metallardan ibarətdir. Bu səbəbdən asteroidin tam 10 kvintilyon dollar dəyərində olduğu iddia edildi.

Bununla belə, ABŞ-nın Purdue və Bravn universitetlərindən olan tədqiqatçılar fevralda asteroiddəki dəmir sıxlığının düşünüldüyü qədər yüksək olmadığını və bu səbəbdən dəyərinin heç də deyildiyi qədər olmadığını aşkarladılar. Meteoritlə eyni adı daşıyan kosmik gəminin "SpaceX"in "Falcon Heavy" raketi ilə avqustun birində buraxılması planlaşdırılırdı. Lakin mayın 24-də nəqliyyat vasitəsinin idarəetmə proqramında problemlər aşkarlandığı və buraxılışın ən tez sentyabrın 20-də həyata keçirilə biləcəyi açıqlandı. İndi isə kosmik agentlik proqram təminatı ilə bağlı sınaqların davam etdiyini açıqlayıb. Bildirilib ki, proqram təminatı və sınaq avadanlığının çatdırılması gecikdiyi üçün gəmi işə salınana qədər lazımi proseslərin görülməsi mümkün olmayıb. NASA mütəxəssisləri problemi həll etsələr də, sınaqların davam etdiyini və bu il kosmik gəmini göndərmək üçün kifayət qədər vaxt olmadığını açıqlayıblar.

NASA-nın Reaktiv Sürət Laboratoriyasının direktoru Lauri Leşin açıqlamasında, "Qravitasiya yardımı üçün Marsdan istifadə edərək uzaq metallarla zəngin asteroidə uçmaq fövqəladə dəqiqlik tələb edir. Biz bunu düzgün əldə etməliyik" - deyib.

Psyche kosmik gəmisi bu il buraxılacağı təqdirdə 2026-cı ildə asteroidə çatacaqdı. Sonrakı illərdə həyata keçiriləcək buraxılış o deməkdir ki, kosmik gəmi müxtəlif orbital mövqelərə görə daha uzun səyahət etməlidir. Bundan əlavə, NASA-nın ikili asteroid sistemlərini araşdırmaq üçün eyni "SpaceX" raketində buraxılması planlaşdırılan "Janus" missiyaları və kosmosda ünsiyyəti yaxşılaşdırmaq üçün nəzərdə tutulmuş "Deep Space Optical Communications" da dayandırılıb.

Elmir