"Azərbaycanda əsas məsələ yaş deyil, təqaüdün azlığıdır".

Bunu Valyuta.az-a açıqlamasında iqtisadçı ekspert Natiq Cəfərli əmək və əhalinin sosial müdafiəsi naziri Sahil Babayevin pensiya yaşı ilə bağlı açıqlamasına aydınlıq gətirərkən deyib. 

Onun sözlərinə görə, bu məsələdə ən böyük problem elə budur:

“Zaman-zaman bilərəkdən, ya bilməyərəkdən məmurlar, ekspert və iqtisadçılar bunun müzakirəsini yaş məsələsinə tərəf aparırlar. Bu doğru deyil, problem təqaüdün az olmasıdır. Azərbaycanda təqaüd yaşının az və çox olması əhalinin ən az maraqlandıran məsələdir”.

Natiq Cəfərli hesab edir ki, Azərbaycanda təqaüdə çıxmaq istəməyənlərin sayı üstünlük təşkil edir:

“Təqaüd daha aşağı, maaşlar daha çoxdur. Demirəm ki, təqaüd yaşı müzakirə olunmalı məsələ deyil. Bu ikinci dərəcəlidir. Birinci məsələ isə vətəndaşın özünü normal dolandıra biləcək təqaüdün almasıdır. Bunu həll etmək lazımdır”.

Qeyd edək ki, Əmək və Əhalinin Sosial Müdafiəsi naziri Sahil Babayev açıqlamasında pensiya yaşı ilə bağlı məsələyə toxunub. Nazir bildirib ki, “pensiya yaşı 50-55 yaşa endirilməlidir. Bunu deyən şəxslər fərqində deyillər ki, araşdırma aparmadan dedikləri bu fikirlər Azərbaycanın gələcəyi üçün nələr vəd edir”.

Aylin