İstanbulda bir bankın Seçil Erzan adlı şöbə müdiri Türkiyədə oynayan bəzi futbolçulara maliyyə baxımından ağır zərbə vurduğu müəyyənləşib.

Valyuta.az xəbər verir ki, Bank Tənzimləmə və Nəzarət Təşkilatının (BDDK) Erzanla bağlı hazırladığı hesabatda hadisələrin təfərrüatı açıqlanıb. Üç ekspert tərəfindən hazırlanan 42 səhifəlik hesabatda diqqətçəkən detallar yer alıb.

BDDK-nın hesabatına görə Türkiyə millisinin sabiq futbolçusu Arda Turan 14 milyon dollar itirib. Məlumata görə keçmiş futbolçu bu pulları bankdan kənarda Erzana əl ilə çatdırıb. Bank əməkdaşı isə bu pulla digər zərərçəkənlərə faiz ödəyib. Erzan, Arda ilə yanaşı Fernando Muslera və Emre Belözoğlu da daxil olmaqla bir sıra məşhur futbolçulara ümumilikdə 80 milyon dollar (2,3 milyard TL ) pul atıb. Nəticədə fırıldaqçı bank rəsmisi həbs edilib.

BDDK müfəttişləri banka "Ərzanın şikayətçilərlə sıx nağd pul dövriyyəsində olduğu müəyyənləşib. Bu mövzuda şahid varmı?" - deyə sorğu göndərib və aldıqları cavab təəccüb doğurub. Bank cavab məktubunda məsələ ilə bağlı onlara heç bir şikayət daxil olmadığını vurğulayıb. Müfəttişlərin diqqət çəkdiyi digər şübhəli məqam Erzanın yüksək nağd pul əməliyyatları həyata keçirməsi olub. Daha sonra Erzanın Belözoğlundan beş, Musleradan isə bir milyon dollar aldığı üzə çıxıb. Həmçinin onun əlavə faiz vədi ilə futbolçu Semih Kayadan üç milyon 200 min dollar aldığı və bunu beş milyon 700 min dollar olaraq geri qaytardığı müəyyənləşib. Erzanın Kayaya verdiyi əlavəni isə Belözoğlu və Turandan aldığı pulla ödədiyi bildirilib.

Məşhur türkiyəli mütəxəssis Fatih Terimin də Erzan tərəfindən aldadıldığı bildirilsə də bu təsdiqini tapmayıb. Daha doğrusu bank əməkdaşının Terimdən heç bir vəd qarşılığında pul almadığı məlumatda yer alıb. Buna baxmayaraq Erzanın Terimin bank əməliyyatları ilə maraqlandığı və maliyyə məsləhətləri verdiyi qeyd edilib.

BDDK-nın məlumatına görə Muslera Erzana verdiyi pulun 700 min dollarını geri ala bilib.

Elmir