Yaxın aylarda "Apple" "iPad mini 7" və iki yeni "iPad Air" modeli də daxil olmaqla bir neçə markalı planşet buraxmağı planlaşdırır. 

Valyuta.az xəbər verir ki, bu barədə "9to5mac" portalı mənbələrə istinadən məlumat yayıb.

Əvvəllər analitik Minq-Çi Kuo bildirmişdi ki, "Apple" yeni "iPad mini" üzərində işləyir və onun 2023-cü ilin sonu və ya 2024-cü ilin əvvəlində buraxılması gözlənilir. Bu məlumat daha sonra "ShrimpApplePro" insayderi tərəfindən təsdiqlənib. "9to5mac"ın mənbəsinə görə, "Apple" həqiqətən də yaxın gələcəkdə "iPad mini 7"ni buraxmaq niyyətindədir, lakin dəqiq vaxt hələ açıqlanmayıb.

Yeni "iPad mini" öz sələfinin dizaynını saxlayacaq, lakin yeni avadanlıqlarla təmin ediləcək. 2021-ci ilin sentyabrında təqdim edilən hazırkı "iPad mini 6" "iPhone 13"də də istifadə olunan "A15 Bionic" çipi ilə təchiz edilib.

"Apple" həmçinin J126b kod adlı əsas "iPad"i sınaqdan keçirir. Keçən il "iPad Air" dizaynı və USB-C portu olan, lakin "A14 Bionic" çipi ilə 10-cu nəsil "iPad" təqdim edilib. Göründüyü kimi, yeni məhsul mövcud dizaynı saxlayaraq, performans baxımından təkmilləşdirmələr alacaq.

Şirkət həmçinin J507/J508 və J537/J538 kod adlı "iPad Air 6"nın iki yeni versiyasını sınaqdan keçirir. Eyni xəttin iki modeli üzərində eyni anda işləmək "Apple"ın əsas və daha böyük ekranlı "iPad Air" və ya standart, həmçinin daha güclü versiyanı buraxmaq üçün mümkün planlarını göstərə bilər. 

Bundan əlavə, "Apple" şirkəti M3 çipi ilə flaqman "iPad Pro"nu buraxmağı planlaşdırır. Planşetin versiyaları Wi-Fi və mobil dəstəyi olan 11 düymlük modellər üçün J717 və J718, daha böyük ekran ölçüsü olan modellər üçün isə J720 və J721 kimi təyin edilib.

Nəhayət, "Apple" "iPad" üçün planşeti daha çox noutbuka bənzəyən yeni "Magic Keyboard" hazırlayır. Dizayn alüminiumdan hazırlanacaq və trekpad daha böyük olacaq. R219 kod adlı yeni klaviatura (indiki versiya R1x adlanır) akselerometr də daxil olmaqla yeni sensorlarla təchiz ediləcək.

Paşa Məmmədli