“AzeSteelCompany” ASC 2022-ci il üzrə maliyyə hesabatlarını açıqlayıb.

Valyuta.az şirkətə istinadən xəbər verir ki, “AzeSteelCompany” 2022-ci ildə 1 milyon 805.7 min manat xalis zərər edib. Halbuki, 2021-ci ildə şirkət 297.9 min manat xalis mənfəət açıqlamışdı. 

Hesabat dövründə şirkətin gəlirləri 20 milyon 591,6 min manat(illik müqayisədə 8.4 dəfə çox) satışın maya dəyəri isə 19 milyon 928.3 min manata ( 10.7 dəfə çox) bərabər olub. Şirkət inzibati xərclərini isə 20 dəfə artıraraq 1 milyon 441,5 min manat çatdırıb. Nəticədə əməliyyat zərəri 1 milyon 176.7 min manat təşkil edib.

Bununla belə, 2022-ci ildə şirkət böyüyüb. Belə ki, bu il yanvarın 1-nə “AzeSteelCompany”nin cəmi aktivləri 42.9% artaraq 20 milyon 393.2 min manat təşkil edib. Şirkətin cəmi öhdəlikləri 79.2% artaraq 12 milyon 288,1 min manata, cəmi kapitalı isə 9,4% artaraq 8 milyon 105.1 min manata bərabər olub.  

Xatırladaq ki, “AzeSteelCompany” 2003-cü ildə yaradılıb. Səhmdar cəmiyyəti metal məmulatlarının istehsalı ilə məşğuldur.Onun nizamnamə kapitalı 8,355 milyon manatdır.

Mahir