Öz məhsulunu ölkə xaricinə çıxarmaq istəyən sahibkarlar çoxdur. Onlar daha çox qonşu ölkələrə baxırlar. Lakin böyük ölkələrin bazarlarında da məhsulunu satmaq istəyində olanlar az deyil. Məsələn, ABŞ bazarı böyükdür və ora çıxmaq sahibkar üçün yaxşı ola bilər. Bəs hansı məhsullara ABŞ bazarında tələb var? Azərbaycan məhsulları bu bazarda rəqabətə davamlı olurmu?

ABŞ bazarı üzrə konsultant Ramin Musayev Valyuta.az-a açıqlamasında bildirdi ki, Azərbaycanda olan bəzi məhsullar Amerika bazarında rəqabətə davam gətirə bilər: “Çünki Çin məhsullarının Amerikaya idxalına çox məhdudiyyətlər qoyulur. Ona görə də, Azərbaycan məhsulları orada öz yerini tapa bilər. Amerika bazarı çox böyükdür. Buradan nə qədər məhsul ixrac etsən də, Amerika üçün xırda bir həcm olacaq. Mebel, quru meyvə, orqanik məhsullar, əl işləri və sair ixrac edə bilərik”.

Bəs ABŞ bazarına necə daxil olacağıq? Ramin Musayev Amerikaya məhsul ixrac etməyin yollarından da danışdı: “Bizim məqsədimiz də “Made in Azerbaijan” məhsullarını Amerika bazarına çıxarmaqdır. Onların qablaşdırılması, sertifikatlaşdırılması, oradakı istehsalçı üçün bank hesabı, şirkət təşkil edirik. Bunun üçün ilk olaraq biz Amerikaya ixrac edilməsi planlanan məhsulu “Amazon”, “E-bay”, “Walmart” kimi onlayn marketlərə çıxarırıq. Orada reytinq hazırlayandan sonra biz buradakı məhsulları Amerikaya uyğunlaşdırırıq.  Maraq olarsa, digər idxalçılarla da müqavilə bağlayıb məhsulları sata bilirik”.

Həmsöhbətimiz amerikalıların xasiyyətinin məhsulunu satmaq istəyənlər üçün əlverişli olduğunu da əlavə etdi: “Amerikalılar azərbaycanlılardan fərqli olaraq endirim istəmirlər. Yəni ki, kimə nə lazımdırsa, onu “Amazon”, “E-bay”, “Walmart” və ya hansısa mağazadan alır. Orada bizdəki kimi ucuz qiymət axtarmırlar. Əhalinin alış qabiliyyəti dəfələrlə yüksəkdir. Onların ənənələrinə görə, pul qazanırsansa, onu xərcləməlisən”.

Nuray