“iPhone 14” seriyasında təklif edilən təcili peyk əlaqəsi üçün “Globalstar”la müqavilə bağlayan “Apple”, indi “SpaceX”lə 64 milyon dollar dəyərində olan anlaşma sənədi imzalayıb.

Valyuta.az xəbər verir ki, “Apple”in uzun müddət bağlı qapılar arxasında inkişaf etdirdiyi peyk vasitəsilə rabitə texnologiyası “iPhone 14” modellərində ortaya çıxdı. Peyk əlaqəsi telefonların dalğa qəbul etmədiyi yerlərdə Yer kürəsinin orbitində olan rabitə peyklərindən istifadə etməklə mobil rabitə olmadan fasiləsiz əlaqə yaratmağa imkan verir.

“iPhone 14” modellərində istifadə edilən funksiya ABŞ-da yerləşən peyk rabitəsi şirkəti “Globalstar” tərəfindən dəstəklənir. “Apple” bu xüsusiyyət üçün qlobal peyk şirkətlərinə 450 milyon dollar xərcləyəcək. Xərclərin böyük hissəsi peyk şirkətlərinin sahibi olan “Globalstar”a gedəcək.

“Globalstar” 2025-ci ildə kosmosa peyklər göndərmək üçün “SpaceX”ə 64 milyon dollar ödəyəcək. Xəbər Qiymətli Kağızlar və Birja Komissiyasına təqdim edilən müraciətdə təsdiqlənib. Bu peyklər “Globalstar” tərəfindən təmin edilən təcili SOS xidmətlərinin genişləndirilməsində mühüm rol oynayacaq. “Globalstar” cari və gələcək şəbəkə tutumunun 85 faizini “iPhone”lara ayırmağa razılaşıb.

Xidmət Fransa, Belçika, Kanada, Avstriya, Almaniya, İrlandiya, İtaliya, Lüksemburq, Hollandiya, Portuqaliya, Böyük Britaniya, Avstraliya, Yeni Zelandiya və ABŞ-da mövcuddur. Bu əməkdaşlıq Maskın şirkəti ilə “Globalstar” arasında ilk razılaşma deyil. “SpaceX” daha əvvəl Floridadakı Kennedi Kosmik Mərkəzindən peykin buraxılmasında da “Globalstar”a yardım etmişdi.

Elmir