Kanada daşınmaz əmlak bazarında vəziyyəti sabitləşdirmək üçün əcnəbi tələbələrin sayına kvota tətbiq etməyi düşünür.

Valyuta.az xəbər verir ki, bunu jurnalistlərlə söhbəti zamanı Kanadanın infrastruktur naziri Şon Freyzer deyib.

"Düşünürəm ki, bu, nəzərdən keçirməli olduğumuz variantlardan biridir", deyə Freyzer bildirib. 

Eyni zamanda o, hökumətin hələlik bu məsələ ilə bağlı yekun qərar vermədiyini vurğulayıb: “Bunu yaxşı düşünmək lazımdır”.

Qeyd edək ki, Kanada beynəlxalq tələbələr arasında populyar yerdir. Xüsusən də burada iş icazəsi almaq nisbətən asan olduğu üçün xarici vətəndaşları daha çox cəlb edir. Ötən il ölkədə təhsil vizası ilə 800 mindən çox insan olub. 2012-ci ildə bu rəqəm 275 min idi.

Son illərdə Kanadada daşınmaz əmlakın alqı-satqısı və kirayəsi qiymətləri sürətlə yüksəlir və bu, yaşayış dəyəri ilə bağlı müzakirələri əsas siyasi məsələyə çevirir.

Paşa Məmmədli