Dünyada bir milyarddan çox internet saytının istifadə olunduğu virtual aləmdə hər saniyədə üç yeni internet saytı hazırlanır.

Valyuta.az xəbər verir ki, sürətlə inkişaf edən internetin geniş istifadəsi ilə yeni saytların sayı gündən-günə artır. Son məlumatlara görə, orta hesabla hər bir saniyə ərzində üç yeni internet saytı açılır. İnternetin gündəlik həyatın ayrılmaz bir hissəsinə çevrilməsi ilə veb saytlar hər cür məlumat və rəqəmsal dünyaya çıxış üçün böyük əhəmiyyət kəsb edir. Müəssisələr, fərdlər və təşkilatlar müxtəlif məqsədlər üçün veb-saytlar yaradaraq rəqəmsal mövcudluğu artırırlar. Bu vəziyyət internet saytlarının sürətlə yayılmasına səbəb olur.

İngilis alimi Tim Bernersli 1991-ci il avqustun altısında “World Wide Web” (www) layihəsini xaricə giriş üçün təqdim edən mətnlə ilk internet saytını açanda texnologiya əsri üçün ən böyük addımlardan birini atmış oldu. Həmin vaxtdan bəri 32 ildən çox keçib və artıq saytların sayı bir milyardı ötüb.

Əvvəllər yalnız İsveçrədəki Avropa Nüvə Tədqiqatları Mərkəzinin (CERN) daxilindən çıxışı mümkün olan internet saytı “www” missiyasını yerinə yetirə bilmirdi. 1991-ci ildə isə Bernersli saytı ictimaiyyətə təqdim etdi və bu gün istifadə olunan internet səhifələrinin ilk nümunəsi ortaya çıxdı. Dövrün ən böyük ixtiralarından biri hesab edilən internet, ticarətdən təhsilə, əyləncədən nəqliyyata kimi həyatın demək olar ki, bütün sahələrini yenidən formalaşdıran texnoloji inkişaf kimi önə çıxır. 

İnternet trafiki haqqında məlumat paylaşan “Siteefy”nin məlumatına görə, dünya üzrə bir milyard 106 milyon 671 min 903 internet saytı var. Bunların 18 faizi (201 milyon 898 min 446) aktiv istifadə edildiyi halda, 82 faizi qeyri-aktivdir. Gündə 252 min yeni internet saytı açıldığı halda, hər saatda 10 min 500, dəqiqədə 175, saniyədə üç  yeni internet saytı istifadəyə verilir. Bu sürətli böyümə tendensiyası veb tərtibatçıları, məzmun müəllifləri və rəqəmsal marketinq mütəxəssisləri üçün böyük imkanlar yaradır. Veb saytların optimallaşdırılması, yenilənməsi və marketinqi bu artan rəqəmsal ekosistemdə rəqabət üstünlüyü əldə etmək üçün kritik hala gəlib.

“Similarweb”in məlumatlarına görə, dünyada ən çox ziyarət edilən sayt "google.com" olub. “Google”dan sonra ən çox giriş edilənlərin siyahısında “youtube.com”, “facebook.com”, “instagram.com” və “twitter.com” ilk pillələrdə gəlir. 

Orta hesabla istifadəçilər hər dəfə “Google”da 10 dəqiqə 38 saniyə, Yutubda 20 dəqiqə 25 saniyə, feysbukda 10 dəqiqə 43 saniyə, Instaqramda 8 dəqiqə 22 saniyə, “Twitter”də isə 10 dəqiqə vaxt keçirir. 2023-cü ilin aprel ayına olan statistik məlumatlara görə, dünya əhalisinin 64,9 faizi (5,18 milyard) internetdən, 59,9 faizi (4,8 milyard) isə sosial mediadan istifadə edir.

Regional baxımdan ən çox internetə çıxış Şimali Avropadandır.

Elmir