“Hesab edirəm proses həyata keçdikdə həm daxili, həm də xarici turizmin inkişaf etməsinə, qiymətlərin aşağı enməsinə müsbət təsirləri olacaq”.

Bunu Valyuta.az-a açıqlamasında iqtisadi ekspert Eyyub Kərimli “Azərbaycan Hava Yolları” və “Buta Airways” vahid AZAL brendi altında birləşməsinin müsbət tərəflərindən danışarkən deyib. 

Onun sözlərinə görə, Azərbaycanda AZAL-ın uşuş biletlərinin baha olması ilə bağlı həm millət vəkilləri, həm də cəmiyyət tərəfindən böyük nazarılıqlar var:

“Bu ölkənin turizm potensialına mənfi təsir göstərirdi. Çünki AZAL-da qiymətlərin baha olması həm də inhisarçılıq meyillərindən irəli gəlirdi. Ölkəyə daxil olan turistlərin, həm də ölkədən gedən vətəndaşların büdcəsinə mənfi təsir göstərirdi. Bu da ölkəyə turist səfərlərinin azalmasına səbəb olurdu”.

Ekspert bildirib ki, “Buta Airways”in AZAL-la birləşməsinə müsbət bir cəhətləri ola bilər:

"Buta Airways” ekonom daşıma və ekonom sərnişin daşıma ilə məşğul olan şirkətidir. Əgər gələcəkdə bu birləşmə avia biletlərin aşağı düşməsinə səbəb olacaqsa, bu müsbət haldır. Bu ölkədə turizm sektorunun inkişafına da öz töhvəsini verəcək. Hesab edirəm ki, hazırda ölkədə turizm mövsümü gedir. Bu ərəfədə birləşmənin həyata keçirilməsi yalnız müsbət bir hal kimi qiymətləndirmək olar. Bu şərtlə ki, birləşmə hazırkı bilet qiymətlərinin aşağı enməsinə səbəb olsun. Burada qeyd olunduğu kimi həm də yük daşınmaların  qiyməti aşağı enəcəkdir”. 

Qeyd edək ki, 2023-cü ilin oktyabr ayında “Azərbaycan Hava Yolları” və “Buta Airways” vahid AZAL brendi altında birləşəcək.

Aylin