“Biz dolların kəskin ucuzlaşması desək də, burda kəskin ucuzlaşmadan söhbət getmir. Son bir neçə ayda cəmi 5-6 faiz ucuzlaşma var”. 

Bu sözləri Valyuta.az-a iqtisadçı Xalid Kərimli dolların ucuzlaşmasının Azərbaycanda idxal-ixraca təsirləri haqqında danışarkən deyib.

İqtisadçı deyir ki, dollar adətən avroya görə müzakirə edilir:

“Son bir ildə dollar avroya nisbətdə bahalaşsa da, sonradan yenidən ucuzlaşdı. Birjada bir-iki aydan sonra nə olacağını isə bilmirik. Buna görə də gündəlik birja dalğalanmalarının idxal və ixraca ciddi təsiri olmur. Çünki sahibkarlar həmişə bunu nəzərə alırlar”. 

Xalid Kərimli deyir ki, Azərbaycan dolların digər valyutalara nisbətdə güclənməməsinin marağındadır:

“Bunun da səbəbləri var. Bizim manat dollara fiksə edilib. Dollar güclənəndə manat güclənir, ucuzlaşanda isə ucuzlaşır. Amma bu birdən-birə iqtisadiyyatın real strukturuna, idxala, ixraca dərhal təsir göstərmir. Dollar davamlı sürətdə ucuzlaşsa, biz idxal-ixracın ucuzlaşmasından danışa bilərik”. 

İqtisadçı bildirir ki, Azərbaycan hökuməti, ixracatçıları, idxalçıları dolların bahalaşmamasında, əksinə tədricən ucuzlaşmasında maraqlıdır:

“Çünki manat dollara fiksə edilib. Bu da ucuzlaşma, iqtisadiyyatın canlanması üçün vacibdir. Amma bir yandan dolların ucuzlaşması idxalı bahalaşdırır və biz də idxaldan asılı ölkə olduğumuz üçün inflyasiyanı artırır. Manatın ilin əvvəlindən real effektiv məzənnəsinə baxsaq, bahalaşdığını görərik. Bunun da səbəbi odur ki, manat dollara fiksə edilib”.
 
Xalid Kərimlinin sözlərinə görə, manatın real effektiv məzənnəsinin bahalaşması infilyasiyanl aşağı salan amildir:

“Düşünürəm ki, bu cür kiçik dövr üçün hər hansı fikir söyləmək mümükün deyil. Ancaq Azərbaycan iqtisadiyyatı üçün yaxşı olar ki, manat yavaş-yavaş ucuzlaşsın. Dolllara bağlı şəkildə ucuzlaşsa, daha yaxşı olar. Çünki Azərbaycanın əsas ixracı dollarla olan neftdir. Bu da manatla gəlirlərin artması deməkdir. Eyni zamanda ixracın ucuzlaşması da imkan verir ki, yerli istehsal daha rahat şəkildə ixrac edə bilsin”.

Davud