2023-cü ildə "Apple" "iPhone 15-Pro ​​Max"ın ən bahalı versiyasının qiymətini qaldıracaq. Eyni səviyyəli hazırkı modelin (14 Pro Max) ABŞ-da qiyməti 1099 dollardan başlayır.

Valyuta.az xəbər verir ki, bu barədə "MacRumors" tanınmış insayder Ceff Puya istinadən məlumat yayıb. 

Eyni zamanda, mənbənin sözlərinə görə, digər modellər əvvəlki qiymətlərdə qalacaq.

"iPhone 15 Pro Max"ın tarixin ən bahalı "iPhone" markası olacağı ilə bağlı şayiələr ötən ilin sonundan yayılıb. Daha böyük batareya və displeydən başqa, "iPhone 15 Pro Max"ın "15 Pro"dan bir böyük fərqə sahib olacağı gözlənilir - 5x və ya 6x böyütmə ilə periskop obyektivi. Hazırkı "iPhone" modelləri yalnız üçqat böyütmə qabiliyyətinə malikdir.

Periskopik kameralar artıq "Android" smartfonlarında uğurla istifadə olunur, məsələn, belə modul "Galaxy" flaqmanlarında quraşdırılıb. Onların köməyi ilə "Samsung" smartfonları keyfiyyətini itirmədən şəkilləri optik böyütmək imkanı verir.

Həmçinin qeyd edilib ki, yeni "iPhone"lar avqustda kütləvi istehsala keçəcək, ona görə də "iPhone 15"in təqdimatı ənənəyə uyğun olaraq sentyabrda baş tutacaq.

Paşa Məmmədli