Son illərdə ərəblərin dünya futbolunun ulduzlarına elçi düşməsi dəb halını alıb. Kriştiano Ronaldonun “Al-Nasr”a keçidindən sonra digər ərəb klubları da dünya şöhrətli futbolçuları əldə etməyə çalışırlar. Bir neçə gün öncə “Real”ın fransalı hücumçusu Kərim Benzema “Al-İttihad”a transfer olundu. PSJ ilə müqaviləsi bitəndən sonra Lionel Messinin də ərəb klublarından biri istəyirdi. Lakin argentinalı superulduz MLS-də çıxış edən “İnter Mayami”ni seçdi. Buna baxmayaraq ərəb klubları hələ də Luka Modriç kimi bir çox tanınmış futbolçuların arxasınca düşüb. Maraqlıdır, əbalıların dünya ulduzlarını öz ölkələrinə cəlb etmələrində məqsədləri nədir? Bir-iki futbolçu ilə inkişaf mümkündürmü? Yoxsa kommersiya məqsədi daşıyır? Bu barədə Azərbaycanın tanınmış məşqçilərindən olan Yunis Hüseynov fikirlərini bölüşüb.

Hüseynov Valyuta.az-a açıqlamasında bu suallar ətrafında danışıb:

“Ərəblərdə pul həddindən artıq çoxdur deyə dünya ulduzlarını ora dəvət edirlər. Düşünürəm ki, bütün bunlar pulun sayəsindədir. Amma bunun da müsbət cəhəti var. Futbola sevgini artırmaq istəyirlər. Bilirik ki, o ölkələrdə futbol o qədər də inkişaf etməyib. Düşünürəm ki, tanınmış futbolçuların ora getməsi gənclərin, həm də futbolun inkişafına təkan verə bilər. İstəyirlər ki, sevgi çox olsun. Benzema ora gedəndən sonra səhv etmirəmsə, 65 minə yaxın israilli vətəndaş onu izləmək üçün Səudiyyə Ərəbistanına yollanmışdı. Orada futbola maraq çox artıb. Gələcəkdə uşaqların da həmin ulduzlara baxıb istəyi çoxala, yaxşı oyunçular yetişə bilər. Gələcəkdə ərəb futbolunun yüksək səviyyəyə çatması ehtimalı var”.

Maraqlıdır, belə ulduzlara bu qədər pul verməyin mənası varmı? Ümumiyyətlə, bu, nəticələrə hansı şəkildə təsir edə bilər?

“Ulduz futbolçular ya Amerikanı ya Avropa ölkələrini seçir. Ərəbistan belədir ki, həm çox isti olur, həm də klublar Asiya çempionatında oynayır. Pul verməsələr yaxşı futbolçular ora getməz. Fikrimcə, ərəblərin məqsədi futbolu daha da inkişaf etdirməkdir. İstər istəməz gənclər ulduzların yanında oynayanda onlardan nəsə öyrənir. Bunun nəticəsidir ki, dünya çempionatında Səudiyyə Ərəbistanı Argentinanı məğlub etdi. Ancaq düşünürəm ki, ərəblər yaxşı oyunla qalib gəldilər”.

Hüseynov təkcə ulduzların transferinin inkişaf üçün kifayət etmədiyini də bildirdi:

“Razıyam, bir-iki ulduzun ora getməsi ilə futbol inkişaf etməz. Əlbəttə, akademiyalara, uşaq futboluna diqqət yetirməsən, 100 nəfər ulduz transfer etsən da inkişaf olmayacaq. Dəqiq bilmirəm Səudiyyə Ərəbistanında akademiyalar varmı, şərait hansı səviyyədədir. Düşünürəm ki, bu qədər pul varsa, ulduzlar dəvət olunursa, uşaq futboluna diqqət yetirilir, meydançalar salınır və şərait yüksək səviyyədədir. 3-5 uduzla inkişaf mümkün deyil. İnkişaf üçün ilk növbədə futbol akademiyaları lazımdır. Sadəcə, şəraitləri haqda ətraflı məlumatım yoxdur. Dünya ulduzlarına külli miqdarda sərmayə qoyurlarsa, uşaq futboluna da diqqət yetirilməlidir”.

Elmir