Milli Məclisin İqtisadi siyasət, sənaye və sahibkarlıq komitəsinin dünən keçirilən iclasında müzakirəyə çıxarılan “Azərbaycan Respublikasının Mərkəzi Bankı haqqında” qanuna təklif edilən dəyişiklikdə Mərkəzi Banka verilən digər bir səlahiyyət nağd pul dövriyyəsinin təşkil edilməsi ilə bağlıdır.

Belə ki, Azərbaycan Respublikasının Konstitusiyasının 19-cu maddəsinin II hissəsinə və bu Qanuna müvafiq olaraq Mərkəzi Bank pul nişanlarının tədavülə buraxılmasını və tədavüldən çıxarılmasını həyata keçirəcək. 

Bəs bu, Mərkəzi Banka pulla bağlı hansı səlahiyyətlər verəcək? Azərbaycanda devalvasiya olacaqmı?

Valyuta.az məsələni bank məslələri üzrə ekspert Əkrəm Həsənovla müzakirə edib. 

Ekspert qeyd edib ki, pul və qiymətli kağızlar bazarında nəzarətlə bağlı ciddi dəyişiklik yoxdur: “Bu da pul siyasətində heç bir problemin olmadığını göstərir”.

"Bu səlahiyyətlərin artırılması ölkədə devalvasiya ola biləcəyi ehtimalına hazırlıq ola bilərmi" sualına cavab olaraq iqtisadçı bildirib ki, devalvasiyaya heç bir hazırlıq getmir:

“Azərbaycanın əsas gəlirləri neftdən, qazdan asılır. Neftdən də gələn gəlirlərimiz sabitdir və Azərbaycanın valyuta ehtiyyatları günü-gündən artır. Ona görə də bunu devalvasiyaya hazırlıq kimi qiymətləndirmək olmaz”. 

Davud