“Hazırda əmlak bazarında əhəmiyyətli qiymət artımı var. Nəzərə alsaq ki, tikinti materialları tikintinin maya dəyərinin 45%-ni təşkil edir. Aparılmış hesabatlara görə, tikinti materiallarının qiymət artımı yeni inşa olunacaq binaların layihəsindən və tikinti ərazisindən asılı olaraq qiymətlərə 7-14 faiz səviyyəsində təsir göstərir”.

Bu barədə Modern.az-a açıqlamasında əmlak məsələləri üzrə ekspert Nüsrət İbrahimov bildirib. Ekspert son günlər tikinti materiallarının qiymətlərinin artdığını diqqətə çatdırıb:

“Ötən ilə nisbətən tikinti materialları bazarında 19,6% qiymət artımı müşahidə edilir. Qiymət artımı bütün tikinti materiallarında özünü göstərir. Yerli istehsal olan mişar daşı 9.1%, sement 9%, taxta materialları 27%, dikt 54.8%, armatur 20.8% bahalaşıb. Digər məhsullarda da bahalaşma müşahidə edilir. Bundan əlavə, dəmir məmulatlarının qiyməti 34.6%, dam örtüklərinin qiyməti isə isə 19.2% artıb.

Tikinti materiallarının qiymətinin artması satış qiymətlərinə 7-11 faiz aralığında təsir edəcək. Təbii ki, bahalaşma alqı-satqıların sayının azalmasına gətirib çıxaracaq. Həm istehlak məhsullarında, həm istehsal məhsullarında və digər sahələrdə qiymətlərin artması insanların xərclərini tənzimləməsinə gətirib çıxaracaq”.

Ekspert əlavə edib ki, yeni tikililərdə qiymət artımı tikinti bazarındakı mövcud vəziyyətlə əlaqədardır:

“Digər tərəfdən tikinti materiallarından başqa, əmək qüvvəsində qiymət artır, maşın mexanizmində qiymətlər yüksəlir. Tikinti materiallarının qiymətininin qalxması əmlak bazarına təsirsiz ötüşməyəcək. Hazırda tikinti materiallarının bahalaşması əmlak bazarına təsir edir. Son olaraq daşınmaz əmlak bazarında maliyyə yatırımının ümumi həcmində azalmalar müşahidə olunacaq. Bu da satışın və tikintinin azalması ilə nəticələnəcək”.