Sosial Xidmətlər Agentliyinin stasionar xidmət göstərdiyi ən yaşlı vətəndaşların yaşı açıqlanıb.

Bu barədə Oxu.Az-a Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentlikdən məlumat verilib.

Bildirilib ki, Agentliyin tabeliyində Ahıl şəxslər üçün sosial xidmət müəssisəsində yaşayan ahıllardan iki nəfəri 1926-ci ildə doğulub. Onların 96 yaşı var.

96 yaşlı Ənvər Əfəndiyev 2019-cu ildən, həmyaşıdı Tatyana Mixayılova isə 2021-ci ildən Ahıl şəxslər üçün sosial xidmət müəssisəsinə yerləşdirilib.

Hər iki ahıl şəxs dövlət qayğısı ilə əhatə olunaraq müəssisədə yaradılan yüksək şərait və xidmətlərdən yararlanırlar.

Sosial Xidmətlər Agentliyinin tabeliyində 13 sosial xidmət müəssisəsi (sağlamlıq imkanları məhdud uşaqlar üçün sosial xidmət müəssisələri, psixonevroloji sosial xidmət müəssisələri, Ahıl şəxslər üçün sosial xidmət müəssisəsi, Əlilliyi olan şəxslərin Peşə-Əmək Reabilitasiyası Mərkəzi, İnsan Alveri Qurbanlarına Yardım Mərkəzi və s.) fəaliyyət göstərir.