2021-ci ilin yanvar-iyul aylarında pərakəndə ticarət şəbəkəsində 22,931 milyard manatlıq, o cümlədən 12,379 milyard manatlıq ərzaq məhsulları, içkilər və tütün məmulatları, 10,552 milyard manatlıq qeyri-ərzaq malları satıb. 

Valyuta.az Dövlət Statistika Komitəsinə istinadən xəbər verir ki, 2020-ci ilin yanvar-iyul ayları ilə müqayisədə pərakəndə ticarət dövriyyəsi real ifadədə 2,6 faiz, o cümlədən ərzaq məhsulları, içkilər və tütün məmulatları üzrə 2,4 faiz, qeyri-ərzaq malları üzrə 2,8 faiz artıb.

Hesabat dövründə alıcıların son istehlak məqsədilə aldıqları mallara xərclədiyi vəsaitin 48,7 faizi ərzaq məhsullarının, 5,3 faizi içkilər və tütün məmulatlarının, 13,8 faizi toxuculuq məhsulları, geyim və ayaqqabıların, 6,1 faizi avtomobil benzini və dizel yanacağının, 5,2 faizi elektrik malları və mebellərin, 2,2 faizi əczaçılıq məhsulları və tibbi ləvazimatların, 0,8 faizi kompüterlər, telekommunikasiya avadanlıqları və çap məhsullarının, 17,9 faizi isə digər qeyri-ərzaq mallarının alınmasına sərf olunub.

İlk 7 ayda pərakəndə ticarət şəbəkəsində bir ölkə sakini orta hesabla ayda 327,2 manatlıq, o cümlədən 176,6 manatlıq ərzaq məhsulları, içkilər və tütün məmulatları, 150,6 manatlıq qeyri-ərzaq malları alıb.

Mal qrupları üzrə götürdükdə isə əhali ən çox pulu geyimə xərcləyib. Geyimə xərclənən vəsait 3,153 milyard manat olmaqla 2,4 faiz artıb. Əhali hər ay orta hesabla 450 milyon manatlıq geyim alıb.