Vaksinasiyanın əhatəlilik dairəsinin daha geniş olduğu ölkələrdə epidemioloji vəziyyətin davamlı surətdə yaxşılaşdığı nəzərə alınaraq, avqustun 5-dən daha 20 ölkə vətəndaşlarının, həmin ölkədə daimi yaşayan digər ölkə vətəndaşlarının, vətəndaşlığı olmayan şəxslərin Azərbaycana giriş-çıxışına icazə verilib. 

Valyuta.az xəbər verir ki, Dövlət Turizm Agentliyinin mətbuat katibi Kənan Quluzadə Yenisabah.az-a iyul ayının statistik nəticələrinin hələlik məlum olmadığını deyib:

“Hələ ki, iyul ayının statistik nəticələri yoxdur. Onun nəticələrini yəqin ki, bu günlərdə biləcəyik. Amma ilin 6 ayının statistik nəticələri var. İlk iki ölkə Rusiya və Türkiyə olub. Çünki onlar bizim piroritet bazarlarımızdır. Həmin ölkənin vətəndaşlarına Azərbaycana hava yolu ilə, lakin müəyyən şərtlər əsasında gəlmək icazəsi verilib. Türkiyə ilə Rusiya ənənəvi olaraq Azərbaycana gələn xarici vətəndaşlar üzrə top 4-lükdə olan dövlətlərdir. Əlavə olaraq daha 7 ölkənin vətəndaşlarının gəlməsinə icazə verilib. ABŞ, Böyük Britaniya, Macarıstan, İsrail, Ərəb Əmirlikləri də bu siyahıya daxildir”.

Kənan Quluzadənin sözlərinə görə, ötən illə müqayisədə ölkəyə gələn xarici vətəndaşların sayı 2 dəfə artıb:

“Şübhəsiz, gələnlərin hamısını turist adlandırmaq qeyri-mümkündür. Amma artıq turistik məqsədlər də başlayıb . Turizm Agentlikləri və otellərdən aldığımız məlumatlara əsasən, artıq müəyyən xarici qonaqlar Azərbaycana gəlir”.

Mətbuat katibi mövcud halı beynəlxalq turizmin bərpası adlandırmayıb:

“Avqustun 5-dən daha 20 ölkədən olan vətəndaşların Azərbaycana hava yolu ilə gəlməsinə icazə verilib. Buna daha çox Şimali Amerika, Kanada, Avstraliya, Avropa ölkələri daxildir. Çünki onlar hər biri piroritet bazarlarımızdır. Həmin bazarlarda çalışaraq pandemiyadan öncə turistləri Azərbaycana cəlb etmişik. İndiki vəziyyəti gəliş-gedişi beynəlxalq turizmin bərpası adlandırmaq olmur. Hazırda bərpanın ilkin addımlarını atırıq. Qlobal turizm sənayesinin bərpası optimistik yanaşma ilə 2023-cü ildə gözlənilir. Hələ ki ilkin mərhələdəyik.

Vaksinasiya Azərbaycanda partnyor tərəfdaş dövlətlərdə aparıldıqca qonaq qəbul edə biləcəyimiz ölkələrin coğrafiyasının genişlənildiyini görürürük. Son 2 ay ərzində 29 ölkəyə icazə verilib. Ümid edirik ki, bu proseslər getdikcə uğurlu inkişaf edəcək və coğrafiyamız daha da genişlənəcək”.