5 avqustdan etibarən daha 20 ölkənin (Almaniya, Avstriya, Belçika, Çexiya, Danimarka, İrlandiya, İspaniya, İsveç, İsveçrə, Kanada, Lüksemburq, Malta, Niderland, Polşa, Portuqaliya, Serbiya, Sinqapur, Slovakiya, Sloveniya, Yunanıstan) vətəndaşı, bu ölkələrədə daimi yaşayan şəxslər və vətəndaşlığı olmayan şəxslər hava yolu ilə Azərbaycana giriş-çıxış edə biləcəklər. 

Valyuta.az xəbər verir ki, bu barədə Dövlət Miqrasiya Xidmətinin rəisi Vüsal Hüseynov, Baş nazir Əli Əsədovun 20 ölkə vətəndaşının, bu ölkələrdə daimi yaşayan şəxslərin və vətəndaşlığı olmayan şəxslərin hava yolu ilə Azərbaycana giriş-çıxış edə biləcəyi ilə bağlı qərarını şərh edərkən bildirib. 

“Bu halda yaşı 18-dən yuxarı olan şəxslər COVID-19 pasportu (COVID-19-a qarşı tam peyvənd olunmasını və ya COVID-19-dan sağalaraq immunitetə malik olmasını təsdiq edən sənəd) və uçuşdan əvvəl 72 saat ərzində verilmiş COVID-19-a dair PCR testinin neqativ nəticəsini, 1–18 yaş arasında olan şəxslər isə yalnız müvafiq test nəticəsini təqdim etməlidir” – deyə V.Hüseynov qeyd edib.