“Türkiyə Prezidenti Rəcəb Tayyib Ərdoğan dünən Milli Məclisdə çıxışı zamanı region üçün strateji əhəmiyyət daşıyacaq məsələlərə toxundu. Qardaş ölkə rəhbərinin qeyd etdiyi məsələlərdən biri də “Altılıq Platforması” ilə bağlı idi. Prezident Ərdoğan Rusiya, Türkiyə, Azərbaycan, İran, Ermənistan və Gürcüstan platforması yaradılmasının regional vacibliyini vurğuladı”.

Valyuta.az xəbər verir ki, bunu Milli Məclisin iqtsadçı-deputatı Vüqar Bayramov söyləyib.

Regionda əməkdaşlığın bölgədə uzun müddətli sülhün formalaşması baxımından da vacib olduğunu deyən deputat qeyd edib ki, kommunikasiyaların bərpası və əməkdaşlığın formalaşması üçün isə əsas layihələrdən biri də məhz Zəngəzur dəhlizinin açılmasıdır: 

“Ərdoğan dəhlizin Türk Dünyasının birləşdirilməsi və regionda əməkdaşlıq üçün yeni imkanlar yaratması baxımdan vacib olmaqla yanaşı, bölgədə davamlı sülhün qorunub saxlanması aspektindən də mühüm olduğunu vurğulayıb. Regionun kifayət qədər iqtisadi potensialı var və bu da regional dəhlizlərin əhəmiyyətini artırır. Daha geniş anlamda region ölkələrdən Türkiyə və Rusiya Böyük İyirmilliyə üzv olan ölkələrdir”. 

İranın regionun aparıcı ölkələrindən hesab olunduğunu qeyd edən V.Bayramov vurğulayıb ki, Cənubi Qafqazın isə dayanıqlı sülh kontekstində inkişaf prespektivləri yüksək qiymətləndirilir: 

“Söhbət 3 trilyon dollarlıq Ümumi Daxili Məhsulu olan region ölkələrinin bərpa olunacaq kommunikasiyalardan və xüsusən də Zəngəzur dəhlizindən istifadəsindən gedir. Rusiya 1.7 trilyon, Türkiyə 761.4 milyard, İran 454 milyard, Azərbaycan 48.05 milyard, Gürcüstan 17.48 milyard və Ermənistan 13.67 milyard dollarlıq ÜDM-ə malikdirlər. Azərbaycan Şərq-Qərb və Şimal-Cənub nəqliyyat dəhlizlərinin formalaşmasında yaxından iştirak edir, birbaşa həmin nəqliyyat dəhlizlərinin regional hissəsinin inkişafına, həm də maliyyə dəstəyi nümayiş etdirir”. 

Millət vəkili düşünür ki, zəfərdən sonra regionda formalaşan yeni düzən fonunda bölgədə dayanıqlı inkişaf və sülh üçün isə dəhlizlərin bərpası qaçılmazdır.