Ötən il respublika ərazisində 7 milyon kiloqram tibbi tullantı formalaşıb.

Valyuta.az xəbər verir ki, bunu Ekologiya və Təbii Sərvətlər Nazirliyinin (ETSN) Dövlət Ekoloji Təhlükəsizlik Xidmətinin rəis müavini Ramal Bağırov “Ekspert saatı”nda deyib.

Hər il olduğu kimi, 2020-ci ildə də tibbi tullantılarla bağlı uçotlar aparıldığını deyən R.Bağırov, tibbi tullantıların dörd kateqoriyaya bölündüyünü diqqətə çatdırıb: 

“Bunun içində COVID-19 virusu ilə bağlı olan tullantılar da mövcuddur. COVİD-19-la bağlı tullantılar 26 min kubmetr təşkil edib”.

Rəis müavininin sözlərinə görə, respublika ərazisində koronavirusla əlaqəli müalicə alan xəstələrin istifadəsindən çıxan 140-a yaxın tibbi tullantı xüsusi ayrılan müvafiq nəqliyyat vasitələri ilə daşınaraq zərərsizləşdirilib:

“Zərərsizləşdirmədən sonra əmələ gələn kül təhlükəli tullantılar üçün nəzərdə tutulan poliqonda xüsusi hücrələrdə zərərsizləşdirilərək basdırılır. Hələ də tibbi tullantılarla məişət tullantılarının qarışdırılması mövcuddur. Bu kimi hallara qarşı nəzarət tədbirləri davam etdirilir və qayda pozuntusu olduğu təqdirdə İnzibati Xətalar Məcəlləsinə uyğun olaraq cərimələr müəyyənləşdirilir”.