Pandemiyaya baxmayaraq, bu ilin yanvar-mart aylarında iki ölkə arasında əmtəə dövriyyəsini artırmaq mümkün olub.

Valyuta.az-ın APA-ya istinadən verdiyi məlumata görə, bunu Rusiya Federasiyası Hökumətinin sədri Mixail Mişustin Azərbaycan Baş naziri Əli Əsədovla Moskva şəhərində baş tutan görüşdə söyləyib.

M.Mişustin qeyd edib ki, bu sahədə təxminən 3,5 faiz artım qeydə alınıb ki, bu da 680 milyon dollar təşkil edir: 

“Azərbaycanda Rusiya kapitalı ilə işləyən 1000-ə yaxın şirkət fəaliyyət göstərir. Rusiya Azərbaycanla regionlararası əməkdaşlığın inkişafına xüsusi önəm verir”.

Rusiya Baş naziri Dağlıq Qarabağda əməliyyatlar bitəndən sonra Rusiya, Azərbaycan və Ermənistan tərəfindən qəbul olunan üçtərəfli bəyanatın regionun kompleks inkişafı üçün imkanlar açdığını xüsusi vurğulayıb:

“Əminəm ki, iqtisadi, nəqliyyat və kommunikasiyaların açılması, yeni infrastruktur marşrutlarının yaradılması Cənubi Qafqaz ölkələrinin maraqlarına cavab verir”.

Öz növbəsində, Baş nazir Əli Əsədov Azərbaycan Prezidenti İlham Əliyevin salamlarını yetirib. Vurğulayıb ki, Azərbaycan və Rusiya arasında əlaqələr iki ölkə prezidentlərinin qarşılıqlı etimada əsaslanan münasibətləri sayəsində yüksək səviyyədədir: 

“Azərbaycan Rusiyanın 80-dən çox subyekti ilə iqtisadi əməkdaşlığı uğurla inkişaf etdirir. Ölkələrimiz arasında 230-dan çox hökumətlərarası və müəssisələrarası sənəd imzalanıb, iqtisadi əlaqələr altı “yol xəritəsi” əsasında həyata keçirilir”.

Qeyd edək ki, Ə.Əsədov rusiyalı həmkarını Azərbaycana səfərə dəvət edib. Danışıqların yekununda tərəflər arasında əməkdaşlığın inkişafına dair birgə sənədlər imzalanıb.