“Gürcüstan Azərbaycanın strateji tərəfdaşıdır, hər iki ölkəni ümumi iqtisadi və geosiyasi maraqlar birləşdirir”.

Valyuta.az Report.az-a istinadən xəbər verir ki, bunu Dövlət Gömrük Komitəsinin (DGK) sədr müavini Cavad Qasımov Gürcüstan nümayəndə heyəti ilə görüşdən sonra deyib.

O, pandemiyanın səbəb olduğu məhdudiyyətlərdən sonra əyani görüşün baş tutmasından məmnunluq ifadə edib: 

“Biz gömrük idarələri arasında ilkin elektron məlumatların mübadiləsi və koordinasiyanın daha da gücləndirilməsinin əhəmiyyətini müzakirə etdik”.

DGK-nin sədr müavini görüşdə Azərbaycan və Gürcüstan arasında birgə gömrük məntəqəsi layihəsinin də nəzərdən keçirildiyini qeyd edib: 

“Bu layihə nəzarət prosedurunun idarə olunmasının effektivliyininin artırılması baxımından irəliyə atılmış çox mühüm addımdır. Yeni məntəqə müasir infrastrukturla və ən yeni texnologiyalarla təchiz ediləcək. Ölkələrimiz arasında ticarət dövriyyəsi ildən-ilə artır və buna görə sərhədin keçilməsi prosedurları asan və tez olmalıdır”.