“Keçən ildən başlayaraq ÜST tərəfindən koronavirus pandemiyası elan olunub və bu davam edir. Dünyada bu xəstəlik səbəbindən həyatını itirənlərin sayı 3 milyondan çoxdur”

Valyuta.az xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) Xəstəliklərin profilaktikası və kontrolu departamentinin müdiri Yaqut Qarayeva deyib.

Azərbaycanda indiyədək koronavirusun Böyük Britaniya ştammından başqa yeni növ qeydə alınmadığını deyən Y.Qarayeva qeyd edib ki, hazırda Hindistan ştammının nə dərəcədə təhlükəli olması barədə məlumat yoxdur: 

“Son dövrlər Hindistandakı yoluxma sayı bizi narahat edir. Bunu çox narahatlıqla izləyirik. Hindistanda hər gün yoluxma və ölüm saylarında rekordlar qırılır. Artıq rəsmi olaraq təsdiq olunub ki, Hindistanda virusun yeni mutasiyası qeydə alınıb. Mutasiyalar viruslara xas olan prosesdir. Azərbaycanda da bunu aşkarlamaq üçün testlər aparılır. Ancaq hələ buna rast gəlinməyib. Yeni məlumat olsa, açıqlama verəcəyik”.