Dövlət satınalmaları haqqında” qanun layihəsi Azərbaycan Prezidentinin dövlət satınalmalarında şəffaflığın və səmərəliliyin təmin edilməsinə dair tapşırıqlarının icrası, bu sahədə ölkəmizin beynəlxalq reytinqlərdə mövqeyinin daha da yaxşılaşdırılması məqsədilə hazırlanıb.

Bunu Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili “Dövlət satınalmaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsinin ( birinci oxunuş) müzakirəsi zamanı deyib.

Komitə sədri bildirib ki, qanun layihəsi elektron satınalmanın əhatə dairəsinin genişləndirilməsi, kotirovka sorğusu prosedurunun elektronlaşması və açıq tenderlə yanaşı, kotirovka sorğusunun (5 min manatdan 50 min manatadək olan tenderlər) yalnız portal vasitəsilə həyata keçirilməsini təmin edəcək: 

“Layihə həm də dövlət satınalma proseslərində iştirak haqlarının və digər xərclərin əhəmiyyətli şəkildə azaldılmasına, sahibkarlara iştirak üçün geniş imkanların yaradılmasına, o cümlədən iştirak haqlarının portalın operatoruna ödənilməsinin təşkilini, həmçinin bu vəsait hesabına portalın saxlanılması xərclərinin ödənilməsi məqsədlərinə xidmət edir. Sənəddə dövlət satınalmaları üzrə prosedurların və şikayət mexanizminin təkmilləşdirilməsi nəzərdə tutulub.  O cümlədən satınalma elanları ilə bağlı müddətlərin, təkliflərin qiymətləndirilməsi və müqavilənin imzalanması müddətlərinin azaldılması layihənin müddəalarındandır”.

Komitə sədrinin sözlərinə görə, sənəd eyni zamanda işlərin tamamlanmasına görə təminatın təkrar alınması ilə bağlı tələbin qanunda konkretləşdirilərək bütün təminat müddətini əhatə edir: 

“Sənədə görə, işlərin yoxlanması zamanı satınalan qurum icra olunmuş işlər üzrə razılığa gələ bilmədiyi zaman yaranan gecikmənin tənzimlənməsi və azaldılması, mövcud müqavilələrə edilən əlavələr və kiçik düzəlişlər üçün müddətin azaldılması) konkretləşdirilməsi və optimallaşdırılması, əlavə məsuliyyət tədbirlərinin müəyyənləşdirilməsini nəzərdə tutulur. Layihədə, satınalma müqavilələrinin icrasına başlanılması üçün icazələrin alınmasının satınalan təşkilatlar tərəfindən qabaqcadan təmin edilməsi əks olunub. Belə ki, əvvəllər müqaviləni udan sahibkar (podratçı) müqavilə üzrə icazələri fərdi qaydada aidiyyəti dövlət qurumlarından almalı idi”. 

Onun sözlərinə görə, layihədə portal vasitəsilə həyata keçirilən satınalmalarda (açıq tender və kotirovka sorğusu) iştirak haqqının portalın operatoruna ödənilməsi, portalın təkmilləşdirilməsi üçün dayanıqlı maliyyə təminatının yaradılması və satınalma barədə elanların yalnız portal vasitəsilə verilməsi diqqətdə saxlanılacaq: 

“Halbuki, əvvəllər elanların qəzetlərdə dərci həm maliyyə resurslarının, həm də vaxt itkisinə səbəb olurdu. Sənəddə malgöndərənlərin (podratçıların) ixtisas uyğunluğunun əvvəlcədən qiymətləndirilməsi prosedurunun müddətlərinin göstərilməsi, satınalma komissiyası üzvlərinin sayı, təhsil və peşə tələbləri ilə bağlı suallara aydınlıq gətirilməsi, tender iştirakçısının müsabiqədən kənarlaşdırılması səbəblərinin yazılı şəkildə iddiaçılara təqdim olunmasının tələb kimi qanuna daxil edilməsi əksini tapacaq”.

Tahir Mirkişili bildirib ki, qanun layihəsinin qəbul edilməsi nəticəsində biznes mühitinin əlverişliliyi daha da artırılacaq, bu da ölkəyə investisiyaların cəlb olunmasına töhfəsini verəcək: 

“Eyni zamanda, dövlət satınalmalarında şəffaflığın və səmərəliliyin artmasına, sui-istifadə hallarının minimallaşmasına nail olunacaq. Elektron üsulla keçirilən satınalmaların sayının artacağı üçün satınalmalara nəzarət asanlaşacaq, daha səmərəli hesabatlılıq qurulacaq və nəzarət imkanları genişlənəcək. Sahibkarlar arasında rəqabətliliyin artacağı ilə əlaqədar dövlət vəsaitindən daha qənaətli istifadəyə zəmin yaranacaq. Satınalma prosesində operativlik, çeviklik və əlçatanlıq səviyyəsi yüksələcək”.