“Pandemiya dövründə bank sektorunda diqqəti çəkən məqamlardan biri də təmərküzləşmənin artmasıdır. Təmərküzləşmə həm bank aktivlərində, həm kredit qoyuluşunda, həm də depozit cəlbində artıb”.

Valyuta.az xəbər verir ki, bu sözləri iqtisadçı-ekspert Samir Əliyev, “Bank sektorumuz pandemiya və müharibə dövründə” adlı məqaləsində qeyd edib. 

Ekspert ötən il bankların ümumi aktivlərinin həcminin 2% azaldığını, təmərküzləşməsinin isə daha artdığını bildirib. 

Ölkənin 5 ən böyük bankının bazar payının 67,2%-dən 72%-ə yüksəldiyini deyən S.Əliyev, bunun son illərin ən yüksək göstəricisi olduğu qənaətindədir: 

“Təmərküzləşmənin artmasında əsas rolu aktivlərini əhəmiyyətli dərəcədə artırmağa nail olan Kapital Bank (26,2%) və Paşa Bank (15,6%) oynayıb. Bu banklar bank sektorunda bazar payına görə ölkənin 5 ən böyük banklarından biridir. İlk beşliyə daxil olan digər 3 bankın (Azərbaycan Beynəlxalq Bankı, Xalq Bank, Bank Respublika) aktivlərinin azalması təmərküzləşmənin artmasının qarşısını ala bilməyib”.

Onun sözlərinə görə, depozit qoyuluşunda təmərküzləşmə səviyyəsi 67,8%-dən 71,8%-ə yüksəlib: 

“Ümumi depozit qoyuluşunun azalması fonunda iri banklarda depozit artımı təmərküzləşməni gücləndirib. Məsələn, ötən ilin dekabr ayında depozit qoyuluşunda qeydə alınmış 6,1%-lik və ya 1369,8 milyon manatlıq artımın 84,6%-i 4 böyük bankın (Azərbaycan Beynəlxalq Bankı, Paşabank, Kapital Bank və Xalq Bank)  payına düşüb.

Kredit qoyuluşu üzrə təmərküzləşmə səviyyəsi 61,4%-dən 67,3%-ə yüksəlib. Ölkə üzrə kredit qoyuluşunun azalmasına rəğmən 5 ən böyük bankın kredit qoyuluşu 422 milyon manat artıb və bu, onların bazar payını artırıb”.