Prezident İlham Əliyev Zəngilanın birinci, ikinci, üçüncü Ağalı kəndlərini əhatə edən birinci “Ağıllı kənd” layihəsinin təməlini qoydu. 

Valyuta.az xəbər verir ki, Kənd təsərrüfatı naziri İnam Kərimov, artıq intensiv işlərə başlanıldığını və burada olan 30 yaxın evin qalıqlarının söküldüyünü bildirib.

Kəndarası yolların artıq çəkilməkdə olduğunu deyən nazir qeyd edib ki, kəndin içində də bu işlər aparılır: 

“Hazırda 110-a yaxın işçi çalışır. İşlərin intensiv getdiyi vaxtda təqribən 600-700-ə yaxın işçi çalışacaq”. 

İnam Kərimov Prezident İlham Əliyevə və Birinci vitse-prezident Mehriban Əliyevaya məlumat verib ki, Birinci “Ağıllı kənd” pilot layihəsi Zəngilanın birinci, ikinci, üçüncü Ağalı kəndlərini əhatə edir: 

“Layihənin icrası, əsasən, 5 komponent üzrə aparılacaq. Onlar yaşayış, istehsal, sosial xidmətlər, “ağıllı kənd təsərrüfatı” və alternativ enerji sahələridir. Ərazidə ilk olaraq tam izolyasiya olunmuş və innovativ tikinti materiallarından istifadə olunmaqla 200 fərdi evin tikintisi nəzərdə tutulub. 

Evdaxili mühəndis kommunikasiya, isitmə sistemləri də ağıllı texnologiyalar əsasında qurulacaq. Bu kəndlərdə müasir məktəb, bağça, poliklinika və elektron idarəetmə mərkəzləri inşa olunacaq, turizm infrastrukturu formalaşdırılacaq. Bütün yaşayış evləri, sosial obyektlər, inzibati və ictimai iaşə binaları, kənd təsərrüfatı məhsullarının emalı və istehsalı prosesi alternativ enerji mənbələri ilə təmin ediləcək”. 

Layihənin icrasında Türkiyə, Çin, İtaliya və İsrail şirkətlərinin mütəxəssisləri də iştirak edəcəklər.