Ötən ilin 25 fevralında Türkiyə ilə Azərbaycan arasında enerji və mədən sənayesi sahəsində əməkdaşığa dair bağlanan müqavilə bu gün icra edilməsi üçün təsdiq edilib.

Valyuta.Az Sondakika.com-a istinadən xəbər verir ki, sözügedən müqavilədə mühüm müddəalar yer alıb.

Belə ki, hər iki ölkə bərpa oluna bilən enerji səmərəliliyi sahəsində əməkdaşlığı artırmaq, bu sahədəki layihələri dəstəkləmək və inkişaf etdirmək üçün səlahiyyətli qurumlarını və investorlarını birlikdə işləməyə təşviq edəcəklər. Bununla da, tərəflər əməkdaşlıq qurmaq üçün bir işçi qrupunun yaradılmasına başlayıblar.

Tərəflər karbohidrogen və neft-kimya ehtiyatlarının inkişafı və istifadəsi ilə bağlı layihələrdə texniki əməkdaşlıq qurmaqla yanaşı, həmçinin torpaq və melorasiya mühəndisliyi, kəşfiyyat, hasilat, nəql, emal, karbohidrogenlərin daşınması, paylanması və ticarəti bağlı layihələrdə birgə iştirak edəcəklər.

Digər tərəfdən, təbii qaz anbarlarının, ötürmə infrastrukturunun və əlaqədar texnologiyaların tikintisi, həmçinin  maye qazla işləyən terminalların bərpası, inkişafı, istismarı barəsində ciddi addımlar atılacaq.

Qeyd edək ki, müqavilə qüvvəyə mindiyi gündən başlayaraq 5 il müddətinə birgə işlər aparılacaq və bu müddətin sonunda tərəflərdən heç birisi etiraz etməzsə müqavilənin müddəti daha 5 il artırılacaq.

Tərcümə edən: Kamran Xəlilov