2020-ci ildə Naxçıvan Muxtar Respublikasında 1 milyard 40 milyon 475 min 900 manat dəyərində sənaye məhsulunun istehsalı qeydə alınıb. 

Valyuta.az xəbər verir ki, MR-nın Dövlət Statistika Komitəsinin yaydığı hesabatda, bu göstəricinin 2010-cu ildəki müvafiq göstəricidən 3,3 dəfə çox olduğu bildirilir.

Bu dövrdə sənaye məhsulunun 6,6 faizi dövlət sektorunda, 93,4 faizi qeyri-dövlət sektorunda istehsal edilmişdir. 2010-cu ildə isə bu göstəricilər müvafiq olaraq 12,3 və 87,7 faiz təşkil edib.

Ötən ildə ümumi daxili məhsulun sahə strukturunda sənaye 27,6 faizlik payla ilk yerdə təmsil olunub. 2010-cu ildə isə ümumi daxili məhsulun sahə strukturunda sənayenin payı 18,3 faiz təşkil edib və sıralamada 3-cü yerdə olub.

Ötən ildə hər bir nəfərə düşən sənaye məhsulu 2 milyon 259 min manat təşkil edib ki, bu da 2010-cu ildəki göstəricidən 2,9 dəfə çoxdur. Sənaye məhsulunun 0,1 faizi mədənçıxarma sənayesində, 0,4 faizi su təchizatı; çirkli suların və tullantıların təmizlənməsi, 6 faizi elektrik enerjisi, qaz, buxar və kondisiyalaşdırılmış hava ilə təchizat müəssisələrində və 93,5 faizi emal sənayesində istehsal olunub. 

Emal sənayesində qeydə alınmış məhsul istehsalı 2010-cu ildəki müvafiq göstəricini 3,5 dəfə üstələyib. Emal sənayesi kənd təsərrüfatından və mədənçıxarma sənayesindən əldə edilən məhsulların işlənildiyi və istifadəyə hazır vəziyyətə gətirildiyi sahə olub məşğulluğun təmin edilməsində mühüm yer tutur.