Yay fəslində ürəyimizi sərinlətmək üçün ağlımıza gələn ilk qida dondurma olur. Onun tərkibinə dadlı olması üçün vanil, şokolad, fındıq və başqa dadlı meyvələr əlavə edirlər. Azərbaycanda da dondurma insanların ən sevimli qidalarından biridir. 

Tərkibi çox sadə resept olan dondurmalara bəzən daha çox qalması üçün qatılan əlavə qidalar insan sağlamlığına ziyan vurur. Sərinləmək, dadlı bir desert yemək istəyərkən həm də orqanizmimizə ziyan vurmuş oluruq. Dadı, rəngi, tərkibi fərqli olan dondurmaları alarkən isə ekspertlər daha diqqətli olmağa çağırır. Çünki bazarda olan bir çox dondurmalar müxtəlif, antisanitar sexlərdə də hazırlana bilir. 

Dondurmaları alarkən onların saxlanılma temperaturuna diqqət etmək məsləhət görülür. Dondurmanın saxlanma müddəti də azdır. Belə ki, dondurmalar istehsal edildikdən sonra 30 gün mənfi 20-25 dərəcədə temperaturda dondurucuda saxlanılmalıdır. Satışa çıxarıldıqda isə anbarlarda mənfi 18 dərəcə temperaturda 5 gün saxlanıla bilər. 

Keyfiyyətli dondurma tərkibində yağlılığı çox olanlar hesab olunur. Əgər dondurma ağzımızda əriyib, qaymaq dadı verirsə, keyfiyyətli dondurma yeyirik deməkdir. Keyfiyyətsiz dondurmaların dadı isə acı olur, sanki buz dadı kimi olur. Dondurmaları əridib təzədən istehlak etmək, satışa çıxarmaq olmaz. Bu zaman onların tərkibi dəyişir. İnsan orqanizmi üçün zərərli mikroorqanizmlər yaranır. 

Mağazadan dondurma alarkən istehlakçılar daha diqqətli olmalıdır. Belə ki, paketlənməsi əzilmiş, deşilmiş, ələ götürərkən bir az yumşalmış kimi olan dondurmanı almaq olmaz. Bundan başqa, dondurmanı çox da yemək olmaz. Tərkibi şəkər və yağla zəngin olduğu üçün yüksək kolorili qida hesab olunan dondurma, həm də soyuğa həssas insanlar üçün də sağlamlığında problem yarada bilər. 

Davud