Azərbaycanda unun topdansatışı ilə məşğul olan şirkətlər tərəfindən verilən məlumata görə, hazırda 50 kiloqramlıq un kisəsinin qiyməti 28,3-29,8 manat arasında dəyişir.

Yeniavaz.com xəbər verir ki, hazırda 50 kiloqramlıq un kisəsini ən ucuz – 28,3 manata “Dəvəçi-Taxıl” MMC, ən baha – 29,8 manata “Azeri-Arapoğlu U.S və T.LTD” BM satır.

Məlumat üçün bildirək ki, ötən ilin yanvar ayında topdansatış mərkəzlərində 50 kiloqramlıq un kisəsinin qiyməti 37-38,5 manat arasında dəyişib.

Rəqəmlərdən də göründüyü kimi, ötən ilin yanvar ayından bu ilin iyun ayına kimi olan dövr ərzində 50 kiloqramlıq un kisəsinin qiyməti 22%-dən çox ucuzlaşıb.

Onu da bildirək ki, Dövlət Statistika Komitəsinin açıqladığı rəsmi məlumata görə, bu ilin may ayında 1 kiloqram çörəyin orta qiyməti 1,19 manat olub. Ötən ilin may ayında isə 1 kiloqram çörəyin qiyməti 1,31 manat təşkil edib.

Açıqlanan rəsmi məlumatdan da göründüyü kimi, ötən ilin may ayından bu ilin may ayına kimi 1 kiloqram çörəyin qiyməti cəmi 9,2% ucuzlaşıb.