“Texniki baxımdan stansiyalarda yeni xətlər atılmayana, depo şəhər ətrafına keçməyənə qədər belə problemlər mütəmadi olaraq mövcud olacaq, intervallar uzanacaq”. 

Bunu Valyuta.az-a nəqliyyat məsələləri üzrə ekspert Rövşən Həsənov son vaxtlar Bakı metrosunda yaranan problemlərin səbəbləri haqqında danışarkən deyib.

Rövşən Həsənov deyib ki, Bakı metrosunda intervalın çox olmasını bir neçə amillə bağlamaq olar:

“Dünyanın bir çox aparıcı dövlətlərində metro stansiyaları növbəti ardıcıllıqla qurulur. Məsələn, əhalinin sayı sürətlə artır, meqopolislər də daha sürətlə inkişaf edir. Böyüyən şəhərlərdə də əvvəldən xətlər atılır və həmin xətlər üzərində o istiqamətdə şəhər böyüdükcə stansiyalar inşa olunur. Əfsuslar olsun ki, bunu Bakı metrosuna şamil etmək mümkün deyil. Sovet dönəmindən Nəriman Nərimanov yaxınlığında inşa olunmuş depo bu kimi amillərə kifayət qədər maneə törədir.

Təsəvvür edin ki, metronun Nərimanov stansiyasından üzü Əhmədli tərəfə hərəkət edən qatarda nasazlıq müşahidə olunur, bu zaman o qatar depoya qayıtmalıdır ki, yeni rezerv qatarla əvəz olunsun. Bu da günün pik saatlarında intervalın böyüməsinə, stansiyalar daxilində insanların sıxlığı ilə müşahidə olunur. Bu da kütləvi formada sərnişinlər arasında narazılığa gətirib çıxaracaq. Yaxşı olar ki, yeni xətlər çəkilsin, texniki baxımdan həmin bu qatarlar yeniləri ilə əvəz olunsun”. 

Davud