Rəqəmsal inkişaf və nəqliyyat nazirinin müşaviri Rəşad Bayramov dünən verdiyi açıqlamada bildirib ki, statistikaya əsasən, 38 min 940 nəfər “Azparking” tətbiqində qeydiyyatdan keçib. 1315 nəfər tətbiqdə balansın artırılması əməliyyatını həyata keçirib. 

Nazirin müşaviri qeyd edib ki, avqustun 7-dən etibarən nəqliyyat vasitələrinin parklanmasına görə nəzərdə tutulan ödənişlərin yığımı nağdsız qaydada həyata keçirilir.

Bəs parklanmaya görə ödənişlərin nağdız qaydada yığımı uğurlu olacaqmı? Bu üsul öz effektini göstərəcək?

Valyuta.az bu sualları nəqliyyat məsələləri üzrə ekspert Eldəniz Cəfərov ilə müzakirə edib. 

Eldəniz Cəfərov deyib ki, parklanma ödənişlərinin yeni mobil tətbiq və SMS sistemi ilə ödənilməsi müasir üsullardır:

“Ona görə də düşünürəm ki, mərhələli şəkildə bu üsul öz effektini göstərəcək”.

Ekpert deyir ki, bunun üçün müəyyən məsələlərin həlli ümün zamana ehtiyac var:

“Məsələn, vətəndaşların mobil tətbiqə, yeni sistemə öyrəşməsi, Bakı şəhərində olan bütün parklanma yerlərinin həmin mobil tətbiqə daxil edilməsi, ünvanların şəffaflaşdırılması və s. bir az vaxt aparacaq. Lakin vətəndaşlar dövlətin balansında olan parklanma yerləri hansı ünvanlardadır, mobil tətbiqdən necə istifadə olunur və s. məsələləri biləndən, tətbiqə alışandan sonra bu problemlər də geri də qalacaq”. 

Qeyd edək ki, iyul-un 25-də Nazirlər Kabinetinin "Nəqliyyat vasitələrinin parklanmasına görə ödənişin məbləği” barədə qərarı qüvvəyə minib. Qərar dövlət avtomobil yollarında təşkil edilmiş parklanma yerlərinə şamil edilir.

"Nəqliyyat vasitələrinin parklanmasına görə ödənişin məbləği” yalnız dövlətə məxsus parkinqlərdə qüvvədə olacaq. Avtomobillərin parklanmasına görə maliyyə dövriyyəsinin şəffaflaşdırılması, rəqəmsallaşmanın və istifadə rahatlığının təmin edilməsi məqsədilə ödənişlərin yalnız nağdsız qaydada həyata keçirilməsi nəzərdə tutulur.

Davud