Dövlət Statistika Komitəsinin məlumatına görə, dəmir yolu nəqliyyatı ilə Azərbaycanda 2023-cü ilin yanvar-iyun aylarında 9,2 mln. ton yük və 3 239,1 min sərnişin daşınıb. Bu isə 2022-ci ilin eyni dövrü ilə müqayisədə yük daşınmasında 6,8 faiz, sərnişin daşınmasında isə 52,2 faiz artım deməkdir. 

Valyuta.az-a açıqlamasında iqtisadçı ekspert Fuad İbrahimov bildirib ki, dəmir yolu nəqliyyatında sərnişin daşımanın 52 faiz artmasında rahatlıq və təhlükəsizlik məsələlərinə cavab verən sürətli qatarların fəaliyyətə başlaması mühüm rol oynayıb:

“Müəyyən müddətdir ki, Azərbaycan ərazisində, ilk növbədə də Bakı-Gəncə istiqamətində müasir tələblərə cavab verən sürətli qatarlar fəaliyyətdədir. Ardınca Bakı-Qəbələ istiqamətində eyni tipli qatarlar fəaliyyətə başladı. Bu addımlar da öz növbəsində mərhələli şəkildə insanların mühüm hissəsini məhz həmin sürətli qatarlardan istifadə etməyə stimullaşdırıb. Rahatlıq, təhlükəsizlik amilləri də dəmir yolu nəqliyyatında sərnişin daşımaların sürətlə artmasına rəvac verib. İndi artım 52 faizdirsə, növbəti ildə onun dəfələrlə artdığının şahidi olacağıq. Belə ki, başqa istiqamətlərdə də sürətli qatarların fəaliyyətə başlaması vətəndaşlarfın əsasən məhz bu istiqamətə üz tutmalarına şərait yaradacaq. Nəticədə yollarda digər nəqliyyat vasitələrindən istifadə məhdudlaşacaq”.

Ramiz