Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında rəqəmsal inkişaf və nəqliyyat naziri Rəşad Nəbiyev taksi xidmətinin qiymətinin bahalaşacağının anonsunu verib. O qeyd edib ki, taksidə qiymətlər birmənalı olaraq qalxacaq. 

Nazir bildirib ki, dünyanın heç bir yerində bu qədər ucuz taksi xidməti yoxdur: “Təxminən ilin sonuna qədər ictimai nəqliyyat üçün 60-a yaxın qısa zolağın çəkilməsi və istifadəsinin təmin edilməsini hədəfləyirik”.

Valyuta.az-a açıqlama verən Liberal İqtisadçılar Mərkəzinin rəhbəri Akif Nəsirlinin fikrincə, sözügedən addım taksi xidmətində ciddi bahalaşmaya səbəb olmayacaq:

“Milli Məclisin İqtisadi siyasət, sənaye və sahibkarlıq komitəsinin iclasında rüsumlar haqqında qanun layihəsi müzakirə olunub. Müzakirələrdə operatorların qeydiyyat haqqının 3 min, taksi fəaliyyətilə məşğul olanların rüsum xərcinin isə 150 manata qaldırılması nəzərdə tutulub. Həmin qanun hələlik parlamentin müzakirəsinə təqdim olunmayıb. Milli Məclisin müzakirəsindən sonra qanunun oktyabrın 1-dən qüvvəyə minməsi gözlənilir. 

Amma sözügedən qanun layihəsi elə də böyük bahalaşmaya səbəb olmayacaq. Belə ki, qanunun qəbulu ilə taksi qiymətlərində olsa-olsa 20-30 qəpiklik artım ola bilər. Taksi xidməti sektorunda rəqabət mühiti sıradan çıxarılmasa, gözlənilən artımlar sözügedən sektora elə də ciddi təsir etməyəcək. Xidmət normal şəkildə fəaliyyətini davam etdirəcək. Yalnız rəqabət mühiti sıradan çıxarılacağı təqdirdə, taksi xidməti sahəsində ciddi bahalaşma baş verəcək”.

Ramiz