Bir vaxtlar çox kasıb olan və çətinliklərə qalib gələrək indiki mövqeyinə çatan bir adamın hekayəsi oxuculara ilham verir. 

Amerikanın Atlanta şəhərində yaşayan və hazırda milyonçu olan 38 yaşlı Castin Qilmore (Justin Gilmore) yoxsulluq və çətinliklər içində keçən uşaqlığını danışıb.

O, sobada qızdırılan su ilə işıqsız evdə tək bir vannada üç qardaşı ilə birgə çimdiyini bildirib. Qilmore bu gün hər ay bir sərvət qazandığını deyir. Yoxsulluq və çətinlikləri yaşamış gənc adam daha çox uğur qazanmaq üçün dayanmadan işləməyə davam edəcəyini söyləyib. O, bir zamanlar elektriklərin kəsildiyi axşamlarda ailəsinin yalnız sendviç və qarğıdalı lopası ilə qidalandığını qeyd edib.

Anasını bir mələk olaraq xarakterizə edən gənc adam, zavallı qadının vaxtında evin ehtiyaclarını ödəmək üçün çox çalışdığını vurğulayıb. Qilmore deyir ki, əksər hallarda aclıqdan qurtulmaq üçün qardaşları ilə birlikdə nənə və babalarını ziyarət edirdilər.

Maddi çətinliklərdən əlavə, Qilmorenin təhsil həyatında da problemləri olub. Təhsilinin uğurlu getmədiyini deyən Qilmore, 15 yaşında müəlliminin onu məktəbdən qovduğunu bildirib.
Məktəbdən qovulması onun sahibkarlıqla məşğul olmağa yönəlməsinə səbəb olub. Əvvəlcə bir marketdə aşağı maaşla işə başlayan Qilmore bir müddət sonra burada müdir vəzifəsinə yüksəlib.

Daha böyük bir iş görmək qərarına gələn Qilmore maşınının arxasında pizza satmağa başlayıb və bu işdə də uğur qazanıb. 2004-cü ildə ilk övladını qucağına alan Qilmore ata olmağın məsuliyyəti ilə daha böyük qərar qəbul edərək bankomatlarla bağlı bir iş qurmağa qərar verib.

Bankomatlara ehtiyacı olan yerləri müəyyən etməyə başlayan gənc adam, həmin məkanlara pulsuz quraşdırma təklif edib və bu yolla işi genişləndirib. Hazırda ölkə üzrə bankomatları idarə edən Qilmore hər ay 240.000 dollardan çox gəlir əldə edir. 600-dən artıq bankomata sahib olan Qilmore, ölkə üzrə 2 mindən çox bankomatı müştərilər üçün işlədir.

Gələcək planlarından danışan gənc milyonçu, işini "Bitcoin" bankomatları ilə davam etdirməyi planlaşdırır.

Əvəz Həsənov