Rəqsanə Məmmədova

Rəqəmsal marketinq və biznesin inkişafı üzrə menecer

Yeni il markalar üçün həm satışlarını, həm də müştərilərilərin loyallığını artırmaq üçün ideal məqamdır. Şirkətlər yeni ildə potensial müştərilərin diqqətini maksimum cəlb etməyə çalışırlar. 

Yeni il marketinqinın xüsusiyyətləri nələrdir?

1. Emosional əlaqə 

Bayram ab-havası insanların emosiyalarını artırır və ilham verir. Əksər insanlar yaxınları üçün hədiyyə axtarışında olur. Bu səbəbdən, brendlər xoş hisslər yaradan, sevinc gətirən, ailə dəyərləri üzərində fokuslanan, qış və yeni il mövzusuna uyğun olan reklam kampaniyaları keçirməlidirlər.  

Məsələn: Emosiya yaradan məşhur reklamlardan biri "Coca-Cola"nın "Bayram Bizə Gəlir" kampaniyasıdır. "Coca-Cola"nın qırmızı yük maşınları və məşhur “Yeni il” musiqisi artıq bayramın simvoluna çevrilib. 

2. Unikal bayram məhsulları  

Yeni il çoxlu sayda dekor tələb edən bayramlardan biridir. Şam ağacı, şam ağacı üçün oyuncaqlar, işıqlandırma, dekorlar və s. Bu səbəbdən brendlər mütləq vizual elementlərə fikir verməlidirlər. 

Məsələn: "Starbucks" yeni il üçün xüsusi hazırlanmış, bayram ab-havasını ifadə edən, limitli sayı olan fincanların satışına başlayır. 

3. Cəlbedici aksiyalar və endirimlər

Endirimlər və xüsusi təkliflər Yeni il markinqinin bünövrəsidir. Çünki bayram artıq tələbat yaradır. Brendlərin məqsədi isə bayram mövsümündə daha çox satış etməkdir. Aksiyalar və endirimlər satışları daha da artırır. Cəlbedici şərtlər müştəridə sərfəli alış hissi yaradır və qərar vermə prosesini sürətləndirir. 

 4. Hədiyyə kartları və sertifikatlar

Qeyri-qida sektorunda isə, yeni il dövründə müştərilər hədiyyə seçiminə qərar verməkdə çətinlik çəkə bilərlər. Markalar bu səbəbdən hədiyyə kartları və ya alış-veriş sertifikatları təqdim etməklə bu problemi həll edirlər. 

5. Sosial məsuliyyət layihələri 

Yeni il həm də xeyirxahlıq zamanıdır. Bir çox şirkətlər yeni il ərəfəsində sosial məsuliyyət layihələri həyata keçirir. Məsələn: “Alış-verişinizlə xeyriyyə işlərinə dəstək olun” və ya “Hər alışdan bir hissə ehtiyacı olanlara gedir” kimi reklam kampaniyaları şirkətlərin müsbət imicini formalaşdırır.

Yeni il marketinqi brend və müştərilər arasında emosional bağlamalar yaratmağa kömək edir. Amma şirkətlər bu dövrdə yalnız satışları artırmaqla kifayətlənməməli, həm də müştərilərlə uzunmüddətli əlaqələr qurmağı hədəfləməlidir. Yaddaqalan kampaniyalar həm biznesin inkişafına, həm də brendin dəyərinin artmasına xidmət edir.