Çinin e-ticarət nəhəngi “Alibaba” süni intellektlə dəstəklənən tərcümə alətinin yenilənmiş versiyasını təqdim etdi. Alibaba iddia edir ki, bu yeni tərcümə aləti “Google”, “DeepL” və “ChatGPT” tərəfindən təklif olunan məhsullardan üstündür.

Valyuta.az-ın məlumatına görə, bu qiymətləndirmə “Alibaba International”ın yeni modeli “Marco MT”nin “Flores” adlı tərcümə müqayisəli çərçivəsinin təhlilinə əsaslanır. “Alibaba”nın yeni tərcümə modeli beynəlxalq bazarlarda böyük diqqəti cəlb etmək məqsədi daşıyır.

“Alibaba”nın sürətlə böyüyən beynəlxalq bölməsi keçən il təqdim edilən və hazırda 500.000 tacir tərəfindən istifadə edilən süni intellektlə tərcümə məhsulunu hazırlayıb. Bu alət satıcılara müxtəlif ölkələrin bazarlarına çatmaq üçün məhsul səhifələrini hədəf bazarlarının dilinə tərcümə etməyə imkan verir.

Süni intellekt ilə kontekstual tərcümə imkanı

“Alibaba Beynəlxalq Rəqəmsal Ticarət Qrupu”nun vitse-prezidenti Kaifu Zhang CNBC-yə bildirib ki, yenilənmiş tərcümə aləti tamamilə böyük dil modellərinə əsaslanır:

“Bu yeni versiya mədəni və ya sənayeyə aid terminlər kimi kontekstli ipuçlarından istifadə edə bilər. Biz bu süni intellekt alətinin treyderlərin gəlirliliyini artırmasını istəyirik, çünki treyderlər uğurlu olarsa, platforma da uğurlu olacaq”.

Böyük dil modelləri “OpenAI”nin “ChatGPT” kimi süni intellekt proqramlarını dəstəkləyir və mətn tərcüməsini həyata keçirə bilir. “Alibaba”nın tərcümə aləti “Qwen” adlı öz dil modeli üzərində qurulub və 15 dili dəstəkləyir. Türk dili də bu dillər arasındadır.

Əvəz Həsənov