12 yaşlı Zoe 7 yaşında ikən qurduğu təbii saç düzümü ilə kukla şirkəti olan “Beautiful Curly Me”nin baş direktoru kimi uğurlu iş adamı olmaq yolundadır. Anası Evana Oli qızının uşaqlığının normal keçməsini təmin edir və işində ona dəstək olaraq arzularını reallaşdırmağa kömək edir.

Valyuta.az xəbər verir ki, “CNBC Make It”in məlumatına görə, ABŞ-ın Atlanta şəhərində yaşayan orta məktəb şagirdi Zoe 7 yaşında məktəbdə saç quruluşuna görə sataşıldıqdan sonra kukla şirkəti qurub. İndi o, “Beautiful Curly Me”nin həmtəsisçisi və baş direktorudur. “Beautiful Curly Me” təbii saç düzümü ilə qəhvəyi gəlinciklər, uşaq kitabları və saça qulluq məhsulları təklif edir.

Zoenin anası Evana Oli əvvəlcə yeniyetmə qızının öz biznesini qurmaqda nə qədər ciddi olduğunu başa düşə bilməyib. Lakin bir neçə aydan və Zoenin şiddətli təkidindən sonra Oli kukla prototipini hazırlamaq, sərfəli istehsalçı tapmaq və markanı işə salmaq üçün əmanətindən 5 min dollar ayırıb.

“Beautiful Curly Me” 2022-ci ildə altı rəqəmli gəlir əldə etdi. Oli 2023-cü il gəlirini bölüşməkdən imtina etdi. Zoe 11-17 yaş arası gənc sahibkarlara qrantlar, mentorluq, şəbəkə imkanları və peşəkar seminarlar təklif edən startap sürətləndiricisi olan “Youth Mean Business”in ən yaxşı tələbəsi və həmtəsisçisidir.

Oli açıqlamasında qızının çox həvəsli olduğunu vurğulayır və Zoenin hər zaman növbəti addımı düşündüyünü deyir. Oli qızına “Beautiful Curly Me” və “Youth Mean Business” şirkətini idarə etmək üçün marketinq direktoru kimi 17 illik karyerasını tərk edib. Şirkətlərin əməliyyatlarını idarə edərkən, o, həm də özünün marketinq və məhsul idarəçiliyi üzrə konsaltinq biznesini həyata keçirir.

Oli qızının indiyə qədər əldə etdiyi uğurları iki valideynlik prinsipi ilə əlaqələndirir.

“Uşağın uşaq olması vacibdir”

Oli qeyd edir ki, Zoenin uşaqlığı normal keçib.

Zoenin hər zaman diqqətini çəkən bir çox şeyin olduğunu ifadə edən Oli deyir ki, uşağın hələ uşaq olması vacibdir. Onun hələ 12 yaşında olmaqdan həzz aldığına əmin olmaq çox əhəmiyyətlidir.

Zoenin tennis, qaçış və teatr kimi dərsdənkənar fəaliyyətləri ilə tipik bir məktəb cədvəli var. O, məktəb işlərini bitirdikdən sonra və yay tətilində öz vəzifə borcunu yerinə yetirir. Anası deyir ki, Zoenin həqiqətən tam, balanslı bir həyatı var. Bu balansı tapmaq və uşağınızın kim olduğuna sadiq qalmasına əmin olmaq vacibdir.

Məsuliyyəti yüksək olan uşaqların valideynlərinə həddən artıq itaətkar olmamaq çətin ola bilər. Bununla belə, həddindən artıq təzyiq uşaqlarda narahatlıq və aşağı özünə hörmət hissi yarada bilər. Arizona Dövlət Universitetinin 2016-cı ildə apardığı araşdırmaya görə, bu, uşaqların gələcəkdə yaxşı nizamlanmış və uğurlu olma ehtimalını azalda bilər.

Mütəxəssislər vurğulayırlar ki, uşaqları öz maraqlarını kəşf etməyə istiqamətləndirməklə yanaşı, ehtiyac duyduqları zaman həvəsləndirmək vacibdir.
Anası bidirib ki, uşaqlara öz qərarlarını vermək üçün etibar etdiyiniz zaman onlar özlərini daha çox məşğul, inamlı və güclənmiş hiss edirlər.

“Övladınızla yaşamayın”

Valideynlər övladlarının onların izi ilə getməsini istəmək və ya onların həyat tövsiyələrinə əməl etmələrini gözləmək kimi təbii instinktlərə sahib ola bilərlər. Amma həqiqətən də onların xoşbəxt və uğurlu olmasını istəyirsənsə, onlara öz həvəslərinin arxasınca getməsinə icazə verməlisən.

Oli ağıllı brend strategiyaları və marketinq vasitəsilə insanlara biznes məqsədlərinə çatmağa kömək etməyi sevir. Zoenin bütün titulları və nailiyyətlərinə gəlincə, o deyir ki, bu, qızım vasitəsilə xəyallarımı yaşadığım vəziyyət deyil:

“Sadəcə, bu yolda ona dəstək ola bildiyim üçün şanslıyam. Mənim Zoenin dəstək sistemi kimi rolum sadəcə ona arzularını həyata keçirməyə kömək etməkdir".
Bu perspektiv dözümlü və uğurlu uşaqların yetişdirilməsi üçün vacib hesab edilir. Uğurlu iş adamları övladlarının qərarlarına hörmətlə yanaşmağın və onlara öz həvəslərinə əməl etmələrinə şərait yaratmağın vacibliyini vurğulayırlar.

Əvəz Həsənov