İşdən çıxarıldınız, yaxud şərait elə gətirdi ki, özünüz işinizdən ayrılmaq məcburiyyətində qaldınız? Siz tək deyilsiniz, hər il milyonlarla insan bunu yaşayır. Prosesin müsbət tərəflərinə baxsaq, bizə daha çox qatqısı ola bilər. Bu dəfə yeni işin bizə təqdim etdiyi üstünlüklərdən danışaq.

Ola bilər ki, iş yerinizdə illərdir işləyirsiniz və o mühitə, rəhbərliyinizə bir mənəvi bağınız var. Gün gəlib işdən çıxarılanda, psixoloji olaraq çətinlik keçirə bilirsiniz. Amma yeni işə keçdiyinizdə, artıq başa düşürsünüz, burda şəxsi gözləntilərə girmək sonra psixoloji olaraq sizə əziyyət verə bilər. Bu cəhətdən, iş yerindəki münasibətləri şəxsi qəbul etməmək kimi bir yanaşma sizdə formalaşa bilir.

Yeni iş yeni başlanğıcdır. Ola bilər ki, əvvəl çalışdığınız yerdə iş və şəxsi münasibətləri qarışdırmaq mövzusunda səhvləriniz olub. Artıq iş-işdən keçibsə, yeni işə keçən zaman bu cəhətdən daha diqqətli ola, şəxsi və iş münasibətləri ilə bağlı sərhədlərinizi müəyyən edə bilərsiniz.

İş və şəxsi həyat balansının qorunması. Əvvəlki şirkətdə üzərinizə götürdüyünüz iş yükü sizə çox idi və sizin o işlərdən imkan etmək kimi lüksünüz də yox idi. Çünki iş müsahibəsində danışığınız elə olub və o işləri hər zaman görmüsünüz. Lakin işləriniz çox olduğunda, şəxsi həyatınıza, özünüzə vaxtınız yetərli qədər qalmırdı. Bu səbəbdən, yeni işə başlayanda, bu cəhətdən daha diqqətli danışıqlar apara bilərsiniz.

Yeni işçi olduğunuz şirkətdə sizdən gözləntilər də çox olur. O səbəbdən özünü göstərmək üçün fürsətlər daha çox yarana bilir. Sizi işə cəlb edən şirkət də maraqlı olur ki, siz o fürsətləri dəyərləndirib şirkətə daha çox qatqıda olasınız. Bu zaman karyera yolunda inkişaf etməyiniz üçün daha çox imkan deməkdir.

İş yerində baş verən neqativ hallara daha peşəkar yanaşırsınız. Çünki əvvəlki işinizdən ayrıldığınızda keçdiyiniz stressli bir dönəm sizə bu cəhətdən də təcrübə qazandıra bilir. İşdə baş verən hallara peşəkar yanaşmağınız yeni iş yerində sizin müsbət bir rol model olaraq iş yoldaşlarınıza tanıda bilir.