İllər keçdikcə peşəkar inkişaf marşrutu ehtiyaclara uyğun olaraq formalaşır. Peşəkarların özlərini bir sıra bacarıqlarla təchiz etmələri indi çox vacibdir. Növbəti illərdə iş həyatında müvəffəqiyyəti təmin edəcək bəzi bacarıqlar var.

Valyuta.az növbəti illərdə işçilərdə axtarılacaq bacarıqları təqdim edir:

Rəqəmsal savadlılıq

Texnologiyanın həyatımızın hər sahəsinə nüfuz etdiyi və süni intellektin sözün əsl mənasında gündəmdə olduğu bu əsrdə rəqəmsal savadlılıq artıq istəyə bağlı bir bacarıq deyil. Bu bacarıq əsas kompüter biliklərindən daha çoxunu əhatə edir. Bu, məlumat analitikası, rəqəmsal marketinq və çoxsaylı rəqəmsal alətlər və platformalardan istifadə etmək bacarığını tələb edir. Buna görə də, ən son texnoloji inkişafları izləmək və onları öz sahənizdə necə effektiv tətbiq edəcəyinizi bilmək çox vacibdir.

Emosional intellekt (EQ)

Emosional intellekt, özünün və başqalarının duyğularını qavramaq, qiymətləndirmək və onlara cavab vermək qabiliyyətidir. Getdikcə daha vacib bir bacarıq kimi qəbul olunmağa davam edir. Avtomatlaşdırma və süni intellektin yüksəlişdə olduğu müasir dünyada EQ açıq şəkildə insan xüsusiyyəti kimi seçilir.

Çeviklik

Son illərdə biz həm sosial, həm də peşəkar həyatda transformasiya prosesinin bir hissəsi olmuşuq. Belə olan halda, mövcud olmaq üçün transformasiya küləyi ilə bir sırada irəliləmək lazımdır. Bu uyğunlaşma vəziyyəti bir daha "çeviklik" bacarığının vacibliyini ortaya qoydu. Yeni bacarıqlar öyrənməyə açıq olmaq, dəyişikliyi qəbul etmək və lazım gəldikdə strategiyaları və ya perspektivləri dəyişməyə hazır olmaq günümüzün tələb olunan bacarıqlarındandır. Bunun gələcəkdə də davam etməsi mümkündür.

Əlavə olaraq, avtomatlaşdırmanın getdikcə rutin işləri öz üzərinə götürəcəyini nəzərə alaraq həm də demək olar ki, tənqidi düşünməyə və mürəkkəb problemləri həll etmək bacarığını inkişaf etdirməyə daha çox vaxt ayırmaq olar.

Liderlik və sosial təsir

Effektiv liderlik, vəzifəsindən asılı olmayaraq başqalarını ruhlandırmaq və motivasiya etməkdir. Növbəti 10 ildə peşəkarlar təsir yaratmaq, əməkdaşlığı təşviq etmək və komandaları ümumi məqsədlərə doğru istiqamətləndirmək yolu ilə rəhbərlik etməyi bacarmalıdırlar. Bu xüsusiyyətə başqalarına təsir etmək və inandırmaq qabiliyyəti ilə sosial təsir də daxildir.

Davamlı öyrənmə və şəxsi inkişaf

Yaşadığımız dəyişiklik küləyinin sürəti öyrənmə prosesinin heç vaxt həqiqətən tamamlanmayacağına işarə edir. Buna görə də mümkün qədər boşluqların bağlanmasına diqqət yetirərək formal təhsil, onlayn kurslar, seminarlar və ya öz-özünə öyrənmə variantları ehtiyaca uyğun olaraq qiymətləndirilməlidir.

Ünsiyyət qabiliyyəti

Getdikcə rəqəmsallaşan dünyada effektiv ünsiyyət peşəkar uğurun təməl daşı olmağa davam edir. Bu, təkcə şifahi və yazılı ünsiyyət deyil, həm də başqalarını aktiv şəkildə dinləmək və empatiya qurmaq bacarığını əhatə edir. Təbii ki, bu məqamda emosional zəka da işə düşür. Uzaqdan iş və qlobal komandalar daha çox yayıldıqca, müxtəlif komandaları idarə etmək və birlikdə işləmək üçün güclü ünsiyyət bacarıqlarını nümayiş etdirmək daha vacib olacaq.

Əvəz Həsənov