Avropanın ən nüfuzlu tibb universitetlərindən biri olan İsveçin Karolinska İnstitutunda leykemiya ilə bağlı onilliklər ərzində aparılan iş məhv edilib.

Valyuta.az xəbər verir ki, Paytaxt Stokholmda institutun apardığı araşdırmadan nümunələr maye azotla işləyən dondurucu sistemdə saxlanılıb. 

Lakin dekabrın 22-23-də -190 dərəcədə işləyən sistemdə nasazlıq yaranıb. Universitetdən verilən açıqlamada, maye azotu 16 soyutma çəninə köçürən sistemdə yaranan texniki problemdən sonra nümunələrin yararsız hala düşdüyü bildirilib. Sistemin nasazlıq halında dörd gün daha işləyə biləcəyi bildirilərkən, problemin vaxtında həll olunmaması səbəbindən nümunələrin itirildiyi açıqlanıb. 

İnstitutun cənub şəhərciyinin dekanı Matti Sallberq açıqlamasında, “Bu, İsveçdə təsəvvür edilə bilən ən pis vaxtda, Milada cəmi bir gün qalmış baş verdi” - sözlərini söyləyib. 

Dekan, təxminən 30 il ərzində xəstələrdən toplanan leykemiya nümunələrinin itirildiyini bildirdi. Nümunələrin geniş miqyaslı araşdırmalarda mühüm rol oynadığına diqqət çəkən səlahiyyətli, onların gələcək tədqiqatlar üçün də istifadə edilməsinin planlaşdırılırdığını açıqlayıb. Sallberq milyonlarla İsveç kronu dəyərində nümunələrin məhv edildiyini desə də, itkilərlə bağlı dəqiq rəqəmi bölüşməyib. 

İsveç mətbuatında yer alan xəbərlərdə istifadəyə yararsız nümunələrin dəyərinin 500 milyon krona çatdığı bildirilib. Problemin hər hansı bir təxribatdan qaynaqlandığını düşünmədiklərini bildirən Sallberq, nasazlıqla bağlı polis araşdırmalarının davam etdiyini bildirib.

Elmir