Yaponiyada bir araşdırma qrupu süni intellekt vasitəsilə toyuqların qaqqıltısını tərcümə etməyin yolunu tapdıqlarını bildirib.

Valyuta.az xəbər verir ki, əvvəllər seks robotları üzərində işləyən Tokio Universitetinin professoru Adrian David Çokun rəhbərlik etdiyi komanda toyuqların müxtəlif emosional vəziyyətlərini şərh edə bilən sistem hazırladığını açıqlayıb. “Deep Emotional Analysis Learning” adlanan ən son texnologiya aclıq, qorxu, qəzəb, məmnunluq, həyəcan və cansıxıcılıq kimi duyğuları süni intellekt vasitəsilə tərcümə edir. Buna uyğun olaraq sistem altı fərqli emosional vəziyyəti 80 faiz dəqiqliklə analiz edə bilir. Komandanın iddiasına görə bu texnika mürəkkəb riyazi alqoritmlərə əsaslanır və hətta toyuqların daim dəyişən vokal nümunələrinə uyğunlaşmaq üçün istifadə edilə bilər. Bu da o anlama gəlir ki, sistem zaman keçdikcə toyuq səslərinin şifrəsini açmaqda daha yaxşı olacaq.

Hələ ki heç bir jurnalda dərc olunmayan araşdırmada 80 toyuqdan alınan səs nümunələri təhlil edilib. Təxminən 200 saatlıq qeydlər araşdırılaraq 100 nümunə əldə edilib. Çıxarılan səs nümunələrini heyvanlardakı müxtəlif emosional vəziyyətlər ilə əlaqələndirmək istəyən komanda yazıları alqoritmə daxil edib. Səkkiz heyvan psixoloqu və baytarla əməkdaşlıq edən tədqiqatçıların fikrincə, sistem toyuqların psixi vəziyyətlərini dəqiq aşkarlaya bilir. Modelin dəqiqlik göstəricisi müxtəlif toyuq cinslərindən və ətraf mühit şəraitindən asılı olaraq dəyişə, bu isə bir çox mütəxəssisin araşdırmanın nəticələrinə şübhə ilə yanaşmasına səbəb ola bilər. Toyuqların bədən dili və sosial əlaqələr vasitəsilə ünsiyyət qura bildiyi də məlumdur. Bu o deməkdir ki, səs yeganə rabitə vasitəsi deyil. Digər tərəfdən, bu, süni intellektdən istifadə etmək üçün əyləncəli və yaradıcı bir üsul kimi görülür. Texnologiya həmçinin insanlarla toyuqlar arasında daha yaxşı ünsiyyət qurmaqda rol oynaya bilər.

Çok açıqlamasında bunun elm üçün böyük bir sıçrayış və hələlik başlanğıc olduğunu bildirib. O, sözügedən texnikaları digər heyvanlara uyğunlaşdıra və onaların cəlb olunduğu müxtəlif sənayelərdə inanılmaz zəkanın əsasını qoya biləcəklərinə ümid etdiklərini deyib. Çok və komandası fermerlərin toyuqları ilə ünsiyyət qurmaq məqsədilə bu texnologiyadan istifadə etmək üçün pulsuz proqram yaratmağı da planlaşdırır.

Elmir