Əvvəllər futbolun ən çox qazanan super ulduzları öz karyeralarını Avropada keçirirdilər. Lakin bu vəziyyət 2023-cü ildə əhəmiyyətli dərəcədə dəyişdi. Kriştiano Ronaldo, Lionel Messi, Kərim Benzema, Neymar kimi oyunçular indi MLS və Səudiyyə Ərəbistanında Avropanın ən böyük adlarından daha çox qazanırlar. Düzdür, Avropanın bəzi klubları da var ki, futbolçulara hələ də göz oxşayan maaşlar verə bilirlər.

Valyuta.az hazırda Avropa klublarında ən yüksək maaş alan oyunçularının siyahısını təqdim edir. Onların ildə evlərinə nə qədər pul apardıqları müəyyənləşdirilib. Rəqəmlər “Capology”dən götürülüb.

Manuel Noyer – 21 milyon avro

David de Xea keçən mövsüm dünyanın ən çox qazanan qapıçısı titulunu saxlasa da, “Mançester Yunayted”lə müqaviləsi başa çatdıqdan sonra bu titulunu itirdi. “Bavariya”nın qolkiperi Noyer isə 2022-ci ildə yeni müqaviləyə imza ataraq, Avropanın ən çox qazanan qapıçısına çevrildi və hazırda da bu ünvanı özündə saxlayır. Bundesliqada qazandığı ardıcıl 11 titulunun hamısında “Bavariya”nın heyətində olduğunu nəzərə alsaq, yəqin ki, onun klub tərəfindən dəstəklənməsi kifayət qədər ədalətli olar. 

Ris Ceyms  – 15,2 milyon avro

Todd Boehlinin rəhbəri olduğu “Çelsi” son illərdə ən yüksək qiymətli yerli ulduzlarını satmağa meyllidir və son illərdə bu şəkildə demək olar ki, 200 milyon funt-sterlinqə qədər toplayıb. Lakin onlar “Cobham” akademiyasının məzunlarından biri, keçən ilin sentyabrında altıillik müqaviləyə imza atan və o vaxtdan bəri klubun kapitanı seçilən Ris Ceymsə çox inanırlar. 

Rafael Varan  – 20,6 milyon avro

Varan 2021-ci ildə “Mançester Yunayted”ə gələnə qədər qazandıqları titullara nəzər salsaq, onun nümayəndələri yüksək maaşlar almaq üçün çox güclü mövqedə idilər. Və şübhəsiz ki, “qırmızı şeytanlar” Varana gözəl maaş ödəyir. 30 yaşlı futbolçu Premyer Liqada ən çox maaş alan müdafiəçidir. 

David Alaba  – 22,5 milyon avro

Avstriyalı, “Bavariya” ilə qazandığı titullardan sonra İspaniyanın paytaxtına azad agent kimi gəldi. “Real”dakı debüt mövsümündə həm La Liqa, həm də Çempionlar Liqasını qazanarkən, Alaba özünü sübut etdi. İkinci il nisbətən məyus olsa da “Copa del Rey”i qazanmağı bacardı.

Lukas Hernandez  – 19 milyon avro

Hernandez bu yayın əvvəlində 40 milyon avro qarşılığında PSJ-yə qoşulmuşdu. Fransalı dünya çempionu Paris klubu ilə beşillik müqavilə imzaladı və Serxio Ramosun gedişindən sonra müdafiə xəttini gücləndirəcək.

Frenki de Yonq – 37,5 milyon avro

“Barselona”, ​​son bir neçə ildə Lionel Messi, Cerard Pike, Serxio Buskets və Xordi Alba kimi yüksək maaşlı futbolçuların ayrılması ilə əmək haqqı fondunu azaltmaq üçün səy göstərdi. Lakin De Yonqun illik 37 milyon avroluq nəhəng maaş paketi keçmiş prezident Xosep Maria Bartomeu dövründə açıq-aydın ehtiyatsız xərcləri xatırladır. Səudiyyə Ərəbistanına getməsə, bu, De Yonqun demək olar ki, karyerasının ən yüksək maaşı olacaq.

Kevin De Brüyne – 24,3 milyon avro

“Mançester Siti”nin belçikalı ulduzu Premyer Liqanın ən çox qazanan oyunçusudur. O, həm də agenti olmayan çox az futbolçulardan biridir. Futbolda bu qədər yaxşı olduğunuz halda təmsilçilik nəyə lazımdır?

Toni Kroos – 24,3 milyon avro

Cəmi 33 yaşı olan Kroos yaxın gələcəkdə təqaüdə çıxmaq fikri olmadığını tez-tez bildirirdi. Alman yarımmüdafiəçi karyerasını daha yüksək səviyyədə bitirməyə çalışdığını və bunun ehtiyat oyunçular skamyasında baş verməsini istəmədiyini açıqlamışdı. Onun hazırkı müqaviləsi gələn ilin yayında başa çatır və Madrid klubunun yarımmüdafiəni Cude Bellinqem, Eduardo Kamavinqa, Aurelien Çuameni kimi gənc futbolçularla gücləndirdiyini nəzərə alsaq, Kroosun butslarını asdığını görmək sürpriz olmaz. 

Ousmane Dembele  – 36,3 milyon avro

Ən yaxşı dostu Mbappe ilə birlikdə olmaq üçün Dembele “Barselona”nı tərk etmişdi. Hələ də “partlayacağını” gözlədiyimiz bir oyunçu üçün pis deyil.

Harri Keyn – 25 milyon avro 

30 yaşlı futbolçu 100 milyon avro qarşılığında “Bavariya”ya transfer olunduqdan sonra Bundesliqa tarixində ən çox qazanan futbolçuya çevrilir. 

Kilian Mbappe – 72 milyon avro

Hazırda dünyanın ən yaxşı oyunçusu olan Mbappenin Avropanın beş əsas liqasında oynayan istənilən futbolçudan demək olar, iki dəfə çox qazandığı bildirilir. O, Səudiyyə Ərəbistanından gələn təklifi rədd etdi. Təsəvvür edirsiniz, Avropanın başqa bir yerinə köçsə, maaşını azaltmalı olacaq. Hətta “Real” belə ona o qədər maaş verməyi öhdəsinə götürmür.

Elmir